O‘zbekistonlik talabalar Google Gemini AI Plus`dan bir yil bepul foydalanishi mumkin
O‘zbekistonlik talabalar Google Gemini AI Plus`ning $60 lik bir yillik obunasidan bepul foydalanishi mumkin. Buning uchun Aileaders.uz platformasi orqali talaba ekanini tasdiqlash kerak. Obuna Gemini, Google Flow va boshqa SI vositalari, shuningdek, 400 GB bulutli xotiradan foydalanish imkonini beradi.
O‘zbekistonlik talabalar Google Gemini AI Plus’dan bir yil davomida bepul foydalanish imkoniga ega bo‘ldi, deb xabar bermoqda.
Qiymati 60 dollarga teng bo‘lgan ushbu obuna vazirlik va Google hamkorligida yo‘lga qo‘yildi. Buning uchun talabalar Aileaders.uz platformasi orqali talaba ekanini tasdiqlashi kerak.
Vazirlik ma’lum qilishicha, Google’ning xalqaro verifikatsiya bo‘yicha hamkor platformasi SheerID O‘zbekistonni rasman qo‘llab-quvvatlanadigan davlatlar ro‘yxatiga kiritgan. Bu o‘zbekistonlik talabalarga Google verifikatsiyasidan o‘tib, obunadan bepul foydalanish imkonini beradi.
Google AI Plus obunasi bir qator sun’iy intellekt vositalari va qo‘shimcha xizmatlardan foydalanish imkonini beradi. Jumladan, Gemini ilovasida foydalanish limitlari ikki baravar oshiriladi va ilg‘or Flash Thinking modeliga kirish ochiladi.
Shuningdek, Google Photo, Disk va Gmail xizmatlari uchun 400 GB bulutli xotira taqdim etiladi. Obunaga kinematografik sahnalar va hikoyalar yaratishga mo‘ljallangan Google Flow vositasi, Gmail ichida Gemini’dan foydalanish, Notebook’ning tadqiqotga yordam beruvchi funksiyalari hamda sun’iy intellekt asosida ishlaydigan musiqa studiyasiga qo‘shimcha kirish imkoniyatlari kiradi.
Aileaders.uz platformasi orqali verifikatsiyadan o‘tishi mumkinligini ma’lum qildi.
Shuningdek, talabalar mazkur platformada jahonning yetakchi kompaniyalari tomonidan taqdim etilgan sun’iy intellekt bo‘yicha 100 dan ortiq xalqaro kurslarni bepul o‘rganishi mumkin.
Aileaders.uz — sun’iy intellekt, dasturlash va raqamli texnologiyalarni o‘rganishga mo‘ljallangan ta’lim platformasi. U 2025-yil noyabrida “Besh million sun’iy intellekt yetakchilari” loyihasi doirasida taqdim etilgan.
Raqamli texnologiyalar vazirligi ma’lumotiga ko‘ra, platformada Coursera, Oracle, Huawei va boshqa xalqaro ta’lim provayderlarining 100 ga yaqin bepul kursi mavjud bo‘lib, taxminan 3000 ta kurs o‘zbek tiliga tarjima qilingan. Foydalanuvchilar sun’iy intellekt asoslari, dasturlash va bulutli texnologiyalarni o‘rganishi, ayrim kurslarni tugatgach sertifikat olishi mumkin.