O‘zbekistonda islomiy moliyalashtirishning «Murobaha» standarti tasdiqlanishi kutilyapti
Markaziy bank islomiy banklar tomonidan tovarlarni ustama qo‘shib, bo‘lib-bo‘lib to‘lash sharti bilan sotish tartibini belgilamoqchi
O‘zbekistonda islomiy moliyalashtirish bo‘yicha «Murobaha» standarti tasdiqlanishi kutilmoqda
Markaziy bank islomiy banklar tomonidan tovarlarni ustama qo‘shib, bo‘lib-bo‘lib to‘lash sharti bilan sotish tartibini belgilashni rejalashtirmoqda.
O‘zbekiston Markaziy banki «Murobaha» nomli ilk islomiy moliya standartini tasdiqlash haqidagi qaror loyihasini tayyorladi.
Hujjatga muvofiq, murobaha — bankning tovarni xarid qilib, uning boshlang‘ich qiymati va qo‘shilgan ustama miqdorini mijozga ochiq bildirgan holda sotishi, jumladan, nasiyaga berish orqali moliyalashtirish usulidir.
Bunda bank avval tovarni o‘z mulkiga olishi, shundan keyingina uni mijozga ustama bilan sotishi mumkin. Tovarning dastlabki narxi hamda bank ustamasi shartnomada aniq ko‘rsatilishi shart.
Muhim jihati shundaki, banklarga moliyalashtirish uchun qo‘shimcha komissiya olish taqiqlanadi. Shuningdek, to‘lov kechiktirilgani yoki muddat uzaytirilgani sababli tovar narxiga qo‘shimcha ustama qo‘shishga ruxsat berilmaydi.
Agar mijoz to‘lovni kechiktirsa, shartnomada ko‘zda tutilgan neustoyka undirilishi mumkin. Biroq bu mablag‘ bank daromadiga emas, balki to‘liq xayriya maqsadlariga yo‘naltirilishi kerak.
Yana bir muhim qoida bo‘yicha, bank tovarni xarid qilishda chegirma olsa, ushbu chegirmaning moliyaviy foydasi mijozga ham berilishi lozim.
Shuningdek, oltin, kumush va valyutalarni nasiyaga murobaha asosida sotish taqiqlanadi.
Yangi standart islomiy bank faoliyatini amalga oshiruvchi moliya muassasalari uchun murobaha operatsiyalarini o‘tkazishning huquqiy tartibini belgilaydi.
Hujjat hozircha Regulyatorning idoraviy buyruq loyihasi bo‘lib turibdi, rasmiy e’lon qilingach kuchga kiradi.