O‘zbekistonda bepul dorilar va tekshiruvlar ro‘yxati kengaytiriladi

O‘zbekistonda bepul dorilar va tekshiruvlar ro‘yxati kengaytiriladi

O‘zbekistonda kafolatlangan tibbiy yordam paketi kengaytiriladi: 2027-yildan boshlab bepul dori vositalari soni 73 taga, tekshiruv turlari esa 36 tagacha oshiriladi. Bu haqda prezident Shavkat Mirziyoyev 27-oktabr kuni “Ko‘ksaroy” qarorgohida sog‘liqni saqlash va farmatsevtika sohasi xodimlari bilan o‘tkazilgan uchrashuvda ma’lum qildi.

Hozirda poliklinikalar 69 nomdagi dori vositalarini bepul yetkazib bermoqda. Shulardan 28 ta pozitsiya reimbursatsiya dasturi doirasida beriladi, 2027-yildan esa ularning soni 69 tagacha yetishi kerak. 2025-yil fevralida Sog‘liqni saqlash vazirligi vakili yashash joyidagi poliklinikalar uchun kafolatlangan hajmga 28 ta diagnostik tekshiruv va 22 ta laboratoriya tahlili kirishini bildirgan edi.

Davlat rahbarining aytishicha, oshqozon, yo‘g‘on ichak, prostata bezi va o‘pka saratonini erta aniqlash ishlari Samarqanddan boshlanib, 2028-yildan barcha hududlarda yo‘lga qo‘yiladi. Buning uchun yiliga 700 mlrd so‘m ajratiladi.

Qandli diabet, sil, yurak-qon tomir kasalliklari, ayollardagi o‘smalar hamda bolalardagi onkogematologik xastaliklarni erta aniqlash dasturlari ham davom ettiriladi.

Prezident, shuningdek, Andijon, Farg‘ona, Namangan, Samarqand va Toshkentda amalga oshirilayotgan infarkt va insultlarni erta aniqlash hamda davolash dasturi natijalari haqida ham ma’lumot berdi. Uning keltirgan raqamlariga ko‘ra, besh oy ichida ushbu kasalliklarning erta bosqichlarida o‘lim ko‘rsatkichi 15 foizga kamaygan.

Kasallik boshlanishidagi “oltin soat”da 855 nafar inson erta o‘lim va nogironlik asoratlaridan saqlab qolindi. Kelasi yil dasturga 280 mlrd so‘m ajratilib, barcha tuman va shaharlar qamrab olinadi.

U mamlakatning barcha tuman va shaharlarini qamrab olishi kerak. Davlat tomonidan kafolatlangan tibbiy yordam paketi ham kengaytiriladi.

Agar hozir ushbu paket doirasida ambulator patsiyentlarga 69 turdagi bepul dori vositalari berilayotgan bo‘lsa, keyingi yilda ularning soni 73 taga yetkaziladi. Paketdagi tibbiy tekshiruvlar soni esa 36 taga chiqadi.

Uchrashuvda prezident sog‘liqni saqlashning birlamchi bo‘g‘inini isloh qilishga alohida to‘xtaldi.

“Doim aytaman, birlamchi bo‘g‘in qancha yaxshi ishlasa, xalqimiz shuncha sog‘lom bo‘ladi”, — dedi Shavkat Mirziyoyev.

Uning so‘zlariga ko‘ra, O‘zbekistonning 28 ta tumanida birlamchi tibbiy-sanitariya yordamini tashkil etishning yangi modeli sinovdan o‘tkazildi. Ushbu tumanlarda 7 mln aholi oilaviy shifokorlarga shaxsan biriktirildi. Bemorlar va tibbiyot xodimlarining majburiyatlari o‘zaro kelishuvlarda mustahkamlab qo‘yildi.

Shuningdek, yangi laboratoriyalar ochildi, shifokor va hamshiralarni o‘qitish yo‘lga qo‘yildi, bemor marshruti — tekshiruvlardan o‘tish va tibbiy yordam olish tartibi ishlab chiqildi.

Prezidentning baholashicha, bu o‘zgarishlar aholining poliklinikalarga bo‘lgan ishonchini oshirishga imkon berdi.

2027-yildan boshlab yangi modelni yana 100 ta tumanda joriy etish rejalashtirilmoqda.

Davlat rahbari so‘nggi o‘n yil ichida O‘zbekistonda 10 mln kishiga xizmat ko‘rsatishga mo‘ljallangan yangi poliklinika va shifoxonalar foydalanishga topshirilganini ma’lum qildi. 58 mingta yangi shifoxona o‘rni yaratildi.

Keltirilgan ma’lumotlarga ko‘ra, zamonaviy tibbiyot muassasalari tarmog‘ining kengayishi va xususiy sektorning rivojlanishi tufayli ko‘rsatilayotgan tibbiy xizmatlar hajmi uch baravarga oshdi.

Bugungi kunda mamlakatda ilgari xorijda o‘tkazilgan 100 dan ortiq murakkab tibbiy amaliyotlar bajarilmoqda. Ular orasida tug‘ma yurak nuqsonlaridagi operatsiyalar, a’zolarni transplantatsiya qilish, robotlashtirilgan operatsiyalar va murakkab neyroxirurgik amaliyotlar bor.

“Oilasining baxtini ko‘rish, halol mehnat qilib, orzulariga yetish, umrini mazmunli o‘tkazish uchun odamga, avvalo, sog‘liq kerak. Shu bois, inson salomatligini asrashni islohotlarimizning eng muhim yo‘nalishlaridan biri etib belgilaganmiz”, — deb ta’kidladi prezident.