O‘zbekistonda 9 oyda xazon va o‘simlik qoldiqlarini yoqish bo‘yicha 4,1 mingdan ortiq huquqbuzarlik aniqlandi
Kosmik monitoring orqali dalalarda somonpoya qoldiqlarini yoqish bilan bog‘liq 915 ta holat qayd etilgan. Ekologiya qo‘mitasi kuz mavsumida nazorat tadbirlarini kuchaytirmoqda.
O‘zbekistonda 9 oy ichida xazon va o‘simlik qoldiqlarini yoqish bilan bog‘liq 4,1 mingdan ortiq huquqbuzarlik qayd etildi
O‘zbekistonda 2026-yilning o‘tgan davrida barg-xazon va o‘simlik qoldiqlarini yoqish bilan bog‘liq 4 ming 100 dan ortiq holat bo‘yicha ma’muriy bayonnomalar tuzildi.
Bunday chiqindilar yoqilganda atmosfera havosiga is gazi, azot oksidlari, mayda dispers zarrachalar va boshqa zararli birikmalar chiqadi. Tutun aholi yashash hududlariga tarqalib, havo sifatining yomonlashuviga olib keladi. Ma’lum qilinishicha, Ekopolitsiya ushbu huquqbuzarliklarning oldini olish maqsadida kuchaytirilgan nazorat tadbirlarini olib bormoqda.
Shuningdek, “O‘zbekkosmos” agentligi bilan hamkorlikda g‘alladan bo‘shagan maydonlarda somonpoya qoldiqlarini yoqish holatlari aerokosmik texnologiyalar yordamida kuzatib borilmoqda. Davlat kosmik monitoringi dasturi doirasida 915 ta shunday holat aniqlanib, aybdor shaxslarga ma’muriy jarimalar qo‘llangan. Yong‘in yuz bergan ekin maydonining har bir gektari uchun qonunchilikda belgilangan tartibda zarar hisoblanadi.
Amaldagi qonunchilikka ko‘ra, dala va aholi punktlarida xazon, ang‘iz, shox-shabba hamda boshqa o‘simlik qoldiqlarini yoqib, atmosfera havosini ifloslantirish taqiqlangan. Ma’muriy javobgarlik to‘g‘risidagi kodeksning 88-moddasi uchinchi qismiga muvofiq, bu huquqbuzarlik uchun fuqarolarga 1 million 320 ming so‘mdan 2 million 200 ming so‘mgacha, mansabdor shaxslarga esa 8 million 800 ming so‘mdan 13 million 200 ming so‘mgacha jarima belgilangan.
Huquqbuzarlik ma’muriy jazo qo‘llanganidan keyin bir yil ichida takror sodir etilsa, fuqarolarga 3 million 80 ming so‘mgacha, mansabdor shaxslarga esa 22 million so‘mgacha jarima solinishi mumkin. Ekologiya qo‘mitasi fuqarolardan xazon va o‘simlik qoldiqlarini yoqish holatlari haqida 1157 qisqa raqami yoki @ecogovuz_bot Telegram boti orqali xabar berishni so‘radi.