Ozarbayjon maktablarida hijob oʻrashga qoʻyilgan taqiq norozilik toʻlqinini keltirib chiqardi
Ozarbayjon maktablarida hijobning taqiqlanishi norozilik toʻlqinini keltirib chiqardi
Ozarbayjonning bir qator shahar va tumanlarida hijobli maktab oʻquvchilari darslarga qoʻyilmaganidan keyin norozilik aktsiyalari boʻlib oʻtdi. Oʻquvchilar sinfdoshlarini qoʻllab-quvvatlash belgisi sifatida darslarga borishdan bosh tortmoqda, ota-onalar esa diniy kiyim sababli bolalarni taʼlim olish huquqidan mahrum qilmaslikni talab qilmoqda. Nizo fonida huquq-tartibot idoralari xodimlari 37 kishini qoʻlga oldi.
Vazirlar Mahkamasining 21 sentyabrdagi 309-sonli qarori bilan tasdiqlangan maktab formasiga qoʻyiladigan talablar bahona boʻldi. Hujjatda hijobga toʻgʻridan-toʻgʻri taqiq yoʻq, ammo amaliyotda uning qoidalari bosh roʻmollariga ham tatbiq etilmoqda. Shu bilan birga, qarorda kiyim-kechak talablarini buzganlik uchun darslardan chetlashtirish shaklidagi alohida chora nazarda tutilmagan.
JAM News maʼlumotlariga koʻra, norozilik namoyishlari Boku va boshqa aholi punktlaridagi maktablar oldida boʻlib oʻtgan. Baʼzi taʼlim muassasalarida oʻquvchilar hijobli qizlarning darslarga kiritilishiga erishish uchun darslarni boykot qilishgan. Ota-onalar ham, agar sinfdoshlari darslardan chetlashtirilishda davom etsa, boshqa bolalarini ham maktabga yubormasliklarini bildirishgan.
12 oktyabr kuni Ichki ishlar vazirligi 37 kishi qoʻlga olingani va Jinoyat kodeksining 233-moddasi — jamoat tartibini buzuvchi harakatlarni tashkil etish yoki ularda faol ishtirok etish boʻyicha jinoyat ishi qoʻzgʻatilganini maʼlum qildi. Idora talqiniga koʻra, qoʻlga olinganlar taʼlim xodimlari bilan nizolashgan, maktablarga zarar yetkazgan hamda ularning ishiga va transport harakatiga xalaqit berishga uringan. Shu bilan birga, vazirlik har bir epizodning tafsilotlari va qoʻlga olinganlarning yoshiga aniqlik kiritmadi.
Kiyim talablari atrofidagi bahs-munozaralar nafaqat maktab oʻquvchilariga, balki pedagoglarga ham taʼsir qildi. 6 oktyabr kuni oʻqituvchilar uchun alohida qoidalar tasdiqlanganidan soʻng, Boku va Sumgaitda hijobli oʻqituvchilarga tazyiq oʻtkazilayotgani haqida xabarlar paydo boʻldi. Mahalliy OAV maʼlumotlariga koʻra, ularning baʼzilariga bosh roʻmolini yechish yoki oʻz xohishi bilan ishdan boʻshash haqida ariza yozish taklif qilingan.
Xukumat rasmiylari cheklovlarni yagona maktab formasiga rioya qilish va taʼlimning dunyoviy xususiyatini saqlab qolish zarurati bilan izohlamoqda. Taqiqga qarshi boʻlganlar esa uning qoʻllanilishi bolalarning darslarga qatnashishini cheklashini va eʼtiqod erkinligiga daxl qilishini taʼkidlamoqda.
Cheklovlarga qarshi norozilik Ozarbayjon chegaralaridan tashqariga ham chiqdi. 3 oktyabr kuni mamlakatning Istanbuldagi konsulligi oldida aktsiya boʻlib oʻtdi: unda ishtirok etganlar hijob oʻrash bilan bogʻliq cheklovlarga qarshi chiqishdi.