Oshqozonga zarar bermaydigan va tez ta’sir qiladigan magniy qaysi? Mutaxassis tavsiyasi
Magniyning aminokislota glitsin bilan birikmasi so‘rilish tezligi va samaradorligi jihatidan o‘rtacha o‘rinni egallaydi.
Oshqozonga zarar yetkazmaydigan va tez ta’sir ko‘rsatadigan magniy qaysi? Mutaxassis tavsiyasi
Magniy preparatlarining organizm tomonidan qanchalik samarali o‘zlashtirilishi uning tarkibidagi qo‘shimcha molekulaga bog‘liq. Mutaxassislar ushbu mineralning turli shakllari bir-biridan nimasi bilan farq qilishi va ularni to‘g‘ri tanlash bo‘yicha tavsiyalarini bildirdi.
Tushuntirilishicha, magniyni sof holatda tabletka ko‘rinishiga keltirib bo‘lmaydi. U albatta boshqa bir molekula — “tashuvchi” yoki “tuz” bilan birikkan bo‘lishi kerak. Magniyning qon tizimiga qanchalik tez o‘tishi va undan qancha qismi organizmga singishi aynan shu moddaga bog‘liq. Tuz oshqozon-ichak yo‘lida qanchalik yaxshi erisa, undagi foydali modda ham shunchalik ko‘p so‘riladi.
Masalan, magniyning limon kislotasi bilan birikmasi (sitrat) suvda juda yaxshi eriydi va qo‘shimcha parchalanishni talab qilmaydi. Shu sabab u qonga tez so‘riladi.
Magniy shakllarining farqi nimada?
Mutaxassislar ma’lumotiga ko‘ra, magniy oksidi juda yomon eriydi. Uning parchalanishi uchun oshqozondagi kislotali muhit zarur bo‘ladi, shunda ham mineralning katta qismi so‘rilmasdan, organizmdan chiqib ketadi.
Magniyning aminokislota glitsin bilan birikmasi (glitsinat) esa so‘rilish tezligi va samaradorligi bo‘yicha o‘rtacha o‘rinni egallaydi.
Qaysi shaklini tanlash kerak?
Shunga qaramay, magniy shaklini mustaqil emas, balki shifokor bilan maslahatlashgan holda tanlash lozim. Shifokorlar preparatni qabul qilishdan ko‘zlangan maqsad va bemorning umumiy holatiga qarab quyidagilarni tavsiya qiladi:
• Ehtiyojni qoplash va yurakni quvvatlash uchun: Biologik jihatdan yuqori singuvchanlikka ega bo‘lgan glitsinat va sitrat shakllari tavsiya etiladi. Ular mushaklardagi zo‘riqishni ham yaxshi bartaraf etadi.
• Qabziyat muammosi bo‘lganda: Sitrat yoki oksid shakllari buyurilishi mumkin. Bu turlar ichak faoliyatini yengil darajada rag‘batlantiradi.
• Sezgir oshqozon-ichak tizimi uchun: Ko‘pincha glitsinat shakli tayinlanadi. U ichak shilliq qavatini zararlamaydi va ich ketishiga sabab bo‘lmaydi.