«Oltin töp»–2026. Mukofotga kim munosib?
27-oktabrga o‘tar kechasi o‘tgan mavsum yakunlariga ko‘ra «Oltin töp» mukofoti sohibi ma’lum qilinadi. Mukofot topshirish marosimi tarixda ilk bor Parijda emas, Londondagi «Palladium» teatrida o‘tkaziladi. Bunga mukofotning 70 yillik yubileyi sabab bo‘lmoqda: 1956-yilda angliyalik futbolchi Stenli Metyuz «Oltin töp»ning ilk egasi bo‘lgan.
Marosim Toshkent vaqti bilan soat 01:00 da boshlanadi. Uni fransiyalik sobiq futbolchi Tierri Anri va teleboshlovchi Keyt Skott olib boradi.
Tashkilotchilar barcha mukofotlarni ikki soat ichida topshirishni rejalashtirgan. 2024-yildan buyon marosim «Frans Futbol» jurnali va UEFA hamkorligida o‘tkazib kelinmoqda.
Asosiy mukofot uchun ikki yetakchi da’vogar bor: «Bavariya» hujumchisi Harri Keyn va «Barselona» vingeri Lamin Yamal. Angliyalik hujumchi sermahsullik borasida ajoyib ko‘rsatkichlarga ega, ispaniyalikda esa jahon chempionati g‘olibligi bor.
Shuningdek, imkoniyati nisbatan yuqori baholanayotganlar orasida Kilian Mbappe, Lionel Messi, Xviça Kvaratsxeliya va Rodri kabi futbolchilarni sanash mumkin.
«Oltin butsa» g‘olibi, JCh bronza medali sovrindori, Bundesliga chempioni va eng yaxshi to‘purari, Germaniya Kubogi va Germaniya Superkubogi sohibi
Angliyalik hujumchi uchun 2025/26 yillar mavsumi faoliyatidagi eng sermahsuli bo‘ldi. U o‘tgan mavsumda «Bavariya» safida 51 ta rasmiy o‘yinda 61 gol urdi. Bundesligada 36 gol bilan to‘purar bo‘lib, Yevropada qatorasiga ikkinchi mavsumda «Oltin butsa»ni o‘ziga qildi.
Bundesligada o‘yinlar nisbatan kamroqligi (34 tur) va Harri barcha o‘yinlarda qatnashmagani (31) hisobga olinsa, uning natijasi ahamiyati oshadi.
Terma jamoadagi o‘yinlar ham qo‘shib hisoblanganda esa uning ko‘rsatkichi yanada salobatli: 65 o‘yinda 73 gol.
Gap faqat gollarda ham emas. Keyn so‘nggi mavsumlarda tayanch zonasida o‘ynaydigan forvardga aylandi. O‘tgan haftada «Arsenal»ga qarshi kechgan o‘yinda ham muxlislar nemislar jamoasining barcha hujumlarini u boshlab berayotgani, hatto darvozabon pozitsiyasidan turib oldingi chiziqqa to‘p yetkazayotganiga guvoh bo‘lishdi. Raqib himoyachilari u nima qilmoqchi ekanini oldindan bilishi mushkul masalaga aylandi.