Olot tumani hokimiga “Fidokorona xizmatlari uchun” ordeni berildi
Nargiza Ne’matovaning ko‘p yillik samarali mehnati, yangi ish o‘rinlarini yaratish orqali aholi farovonligini ta’minlash yo‘lidagi xizmatlari uchun prezident uni mukofotlashga qaror qildi.
Olot tumani hokimiga “Fidokorona xizmatlari uchun” ordeni topshirildi
Buxoro viloyatining Olot tumani hokimi “Fidokorona xizmatlari uchun” ordeni bilan taqdirlandi.
Prezident Shavkat Mirziyoyev 4-noyabr kuni Buxoro viloyatidagi yig‘ilishda Olot tumani hokimi Nargiza Ne’matova o‘z hududini kompleks rivojlantirishda alohida jonbozlik ko‘rsatayotganini qayd etib, davlat va boshqaruv idoralaridagi ko‘p yillik samarali mehnati, yangi ish o‘rinlari yaratish orqali aholi farovonligini ta’minlash yo‘lidagi xizmatlari uchun uni “Fidokorona xizmatlari uchun” ordeni bilan mukofotlashga qaror qilganini ma’lum qildi.
Shu kuni viloyat hokimligida davlat mukofotini tantanali topshirish marosimi bo‘lib o‘tdi. Nargiza Ne’matovaga mukofotni viloyat hokimi Botir Zaripov prezident nomidan topshirdi.
Hokimlik xabarida aytilishicha, ushbu davlat mukofoti uning O‘zbekistonda amalga oshirilayotgan keng ko‘lamli islohotlar jarayonidagi faol ishtiroki, hududni ijtimoiy-iqtisodiy rivojlantirish, aholi turmush farovonligini oshirish, joylarda mavjud muammolarga yechim topish, shuningdek, xalq manfaatlari yo‘lida olib borayotgan samarali mehnatining munosib e’tirofi bo‘ldi.