Oliy sud abort qilishdan bosh tortgan surrogat ona ishtirokidagi vasiylik ishiga aralashmadi
Skan tekshiruvi homilada yurakning ogʻir nuqsoni borligini koʻrsatganidan keyin, surrogat ona ota-onaning abort qilish haqidagi talabini rad etdi.
Oliy sud abort qilishdan bosh tortgan surrogat ona ishtirokidagi vasiylik nizosiga aralashishdan bosh tortdi
Surrogat ona Makkenna Vest er-xotinning xohishiga qarshi ravishda tuqqandan keyin bolaning vasiyligini olishga harakat qilmoqda
AQSh Oliy sudi oʻzlari tomonidan yollangan surrogat onaning homilani abort qilish haqidagi talabini rad etgani bilan bogʻliq vasiylik janjaliga aralashishdan bosh tortdi.
Sudya Yelena Kagan Makkenna Vestning Kaliforniyalik er-xotinga ota-onalik huquqini bergan avvalgi qarorni vaqtincha toʻxtatib turishni soʻrab qilgan shoshilinch murojaatini rad etdi.
20-haftadagi UTT (UZI) tekshiruvi homilada yurakning ogʻir nuqsoni borligini koʻrsatganidan soʻng, ota-ona Vestdan homiladorlikni toʻxtatishni soʻragan. Buning oʻrniga Vest deyarli barcha abortlar taqiqlangan Texas shtatiga borib, bolani dunyoga keltirgan.
Sudning ushbu qarori vasiylikni ota-onaga topshirish haqidagi avvalgi ajrimni oʻz kuchida qoldiradi.
Vest oʻtgan oyda chap qorincha gipoplaziyasi sindromi — yurakning chap tomoni tanaga yetarli miqdorda qon hayday olmaydigan nuqson bilan tugʻilgan chaqaloqning vasiyligini qoʻlga kiritishga harakat qilmoqda.
AQSh Kasalliklarni nazorat qilish va oldini olish markazlari maʼlumotlariga koʻra, bu holat koʻpincha bir nechta jarrohlik amaliyotini talab qiladi, ammo ular toʻliq davolanish kafolati emas. Bunday nuqson bilan tugʻilgan chaqaloqlar umrbod asoratlarga duch kelishlari mumkin.
Bir nechta respublikachi rasmiylar tomonidan qoʻllab-quvvatlangan Vest Texasga yoʻl olgan, u yerda shtat bosh prokurori Ken Pakston ishga aralashib, bolaning ushbu shtatda tibbiy yordam olishini talab qiluvchi shoshilinch sud qarorini taʼminlagan. Chaqaloq tugʻilganidan koʻp oʻtmay jarrohlik amaliyotini boshdan kechirgan.
Oliy sudga topshirilgan arizada Vest davolash imkoniyatlari haqida bilib olganidan va «bu qimmatbaho bolani» saqlab qolmoqchi boʻlganidan keyin ota-ona — Omar Ahmed va Naushin Gilkarning abort qilish haqidagi talablarini rad etganini aytgan.
Vestning taʼkidlashicha, biologik ota-ona bolaga vasiylik qilmasligi kerak, chunki ular hayot uchun xavfli nuqson haqida bilib olgach, bolani abort qilmoqchi boʻlganliklari sababli, unga kerakli tibbiy yordamni koʻrsatmasliklaridan qoʻrqadi.
Associated Press agentligining xabar berishicha, avvalgi sud majlisida Gilkar ular Rumi deb nomlagan chaqaloq «bizning farzandimiz» va «hayotimiz mazmuni» ekanini aytgan. Ularning soʻzlariga koʻra, Vest ularga aytmasdan Texasga ketgan va ularning tibbiy maʼlumotlarni olish imkoniyatini cheklab qoʻygan.
Kaliforniya sudi avvalroq Ahmed va Gilkarga ota-onalik huquqini bergan edi, Texas sudi esa Vestning bolaga yaqinlashishini taqiqlovchi ajrim chiqargan.
Oʻtgan oyda Kaliforniyalik er-xotinning advokati bolaning ahvoli ogʻir ekanini va unda «ehtimoliy asoratlar kuzatilayotganini» aytgan edi.
Vestning taʼkidlashicha, Oliy sud aralashuvisiz u bolaning sogʻligʻi haqidagi maʼlumotlarni olish imkoniyatidan mahrum boʻladi.
Arizada Vestning advokatlari Kaliforniyalik er-xotin bolani xospis parvarishiga topshirishi mumkinligiga shama qilgan.