Oʻzbekistonda homilador ayollarga tibbiy koʻrsatmalarsiz ham kesarcha kesishni tanlashga ruxsat berildi

Oʻzbekistonda homilador ayollarga tibbiy koʻrsatmalar boʻlmasa ham kesarcha kesishni tanlashga ruxsat berildi

Oʻzbekistonda kesarcha kesish amaliyotini oʻtkazishning yangi qoidalari tasdiqlandi. Endilikda ushbu operatsiya uchun tibbiy koʻrsatmalar rasman mustahkamlandi, homilador ayollar esa bunday koʻrsatmalar boʻlmagan taqdirda ham operatsiya boʻyicha mustaqil qaror qabul qilishlari mumkin boʻladi.

Tugʻruq paytida kesarcha kesish uchun tibbiy koʻrsatmalar roʻyxati Adliya vazirligi tomonidan roʻyxatga olindi. Yangi normalar tugʻruqni qabul qiluvchi ham davlat, ham xususiy tibbiyot tashkilotlarida amal qiladi.

Roʻyxatga kesarcha kesish uchun jami 31 ta tibbiy koʻrsatma kiritilgan. Vaziyatga qarab, operatsiyalar shoshilinch, tezkor va rejali turlarga boʻlinadi.

Hujjatda homilador ayolning tanlash huquqi alohida mustahkamlab qoʻyilgan. Agar koʻrsatmalar boʻlmasa, ayol kesarcha kesishni oʻzi tanlashga haqli. Aralashuvdan oldin u yuzaga kelishi mumkin boʻlgan oqibatlar haqida ogohlantirilishi va undan ixtiyoriy rozilik olinishi shart.

Bundan avval BMTning Aholishunoslik jamgʻarmasi Sharqiy Yevropa va Markaziy Osiyo mamlakatlaridagi ayollarning sezilarli qismi tugʻruq paytida qoʻpol muomalaga duch kelgani haqida xabar bergan edi.