Oʻzbekistonda alimentlarni ish haqiga bogʻlamaslik hamda bolaning yoshi va ehtiyojlarini hisobga olish taklif etilmoqda
Oʻzbekistonda alimentlarni hisoblash tartibini qayta koʻrib chiqish, ularni ish haqiga bogʻlamaslik hamda bolaning yoshi va ehtiyojlarini hisobga olish taklif etilmoqda
Oʻzbekistonda aliment miqdorini belgilash tamoyilini oʻzgartirish xohlanmoqda. Ota-onaning rasmiy daromadiga tayanish oʻrniga, bolaning yoshi va uni taʼminlash uchun zarur boʻlgan xarajatlarni hisobga olish taklif qilinmoqda.
Bu haqda Senatdagi muhokamada Bosh vazir oʻrinbosari — Oila va xotin-qizlar qoʻmitasi raisi Dilnoza Kattaxonova maʼlum qildi.
Uning soʻzlariga koʻra, bugungi kunda ayrim ota-onalar aliment miqdorini kamaytirish uchun haqiqiy daromadlarini ataylab yashiradilar yoki rasman kam maosh toʻlanadigan ishga joylashadilar. Shu sababli bola hatto kundalik ehtiyojlariga ham yetmaydigan summani olishi mumkin.
Ushbu muammoni hal qilish uchun bolalar uchun yosh toifasini hisobga olgan holda minimal isteʼmol savatchasini belgilash taklif etilmoqda. Bunda alimentning minimal miqdorini ana shunday savatcha qiymatidan kelib chiqib hisoblash rejalashtirilmoqda.
Hozirda aliment miqdori ota-onaning daromadiga bogʻliq. Bir bola uchun daromadning chorak qismi, ikki bola uchun uchdan bir qismi, uch va undan ortiq bola uchun esa yarmi undiriladi.
Bunda har bir bola uchun toʻlov mehnatga haq toʻlashning eng kam miqdorining 26,5 foizidan kam boʻlishi mumkin emas — hozirda bu 360,4 ming soʻmni tashkil etadi.
Shu tariqa, taklif etilayotgan yondashuvda aliment miqdori nafaqat ota-onaning rasmiy ish haqi, balki birinchi navbatda bolani taʼminlash uchun zarur boʻlgan xarajatlar bilan belgilanadi.
Shuningdek, aliment undirish mexanizmining oʻzini ham oʻzgartirish taklif etilmoqda. Kattaxonovaning soʻzlariga koʻra, xalqaro tajribani hisobga olgan holda, tartib-taomillarning bir qismini bosqichma-bosqich xususiy sektorga oʻtkazish rejalashtirilmoqda. Hozirda aliment undirish bilan asosan Majburiy ijro byurosi shugʻullanadi.
Avvalroq Navoiy viloyatining Karmana tumanida Majburiy ijro byurosi xodimlari aliment toʻlashdan qochib, toʻgʻridan-toʻgʻri tandir ichiga yashiringan erkakni topishgan edi.