Oʻzbekiston Lana Nuseybening BMT bosh kotibi lavozimiga nomzodini qoʻllab-quvvatladi
Oʻzbekiston Lana Nuseybening BMT bosh kotibi lavozimiga nomzodini qoʻllab-quvvatladi
Oʻzbekiston Birlashgan Arab Emirliklari davlat vaziri, mamlakatning BMTdagi sobiq doimiy vakili Lana Zaki Nuseybening tashkilot bosh kotibi lavozimiga nomzodini maʼqulladi.
Bu haqda respublika Tashqi ishlar vazirligi bayonotida aytiladi.
TIV kuchayib borayotgan global tahdidlar fonida tashkilotning yangi rahbarini tanlash ayniqsa muhim ekanini taʼkidladi. Idoraning hisoblashicha, BMT bosh kotibi boy diplomatik tajribaga, yuqori professionallikka va xalqaro muammolarni hal qilish uchun davlatlarni birlashtirish qobiliyatiga ega boʻlishi kerak.
Tashkilot boʻlajak rahbarining asosiy vazifalari qatorida bayonotda xalqaro tinchlik va xavfsizlikni taʼminlash, shuningdek, barqaror rivojlanish maqsadlariga erishish qayd etilgan.
Lana Nuseybe BAEning diplomatik sohasida 2009 yildan beri ishlab kelmoqda. U turli yillarda Tashqi ishlar vazirligining Strategik rejalashtirish departamentini boshqargan, Emirliklarning Afgʻoniston va Pokistondagi maxsus vakili boʻlgan, shuningdek, mamlakatning "Katta yigirmatalik" doirasidagi ishiga tayyorgarlik koʻrishda ishtirok etgan.
2013 yil sentyabr oyida Nuseybe BAEning BMTdagi doimiy vakili etib tayinlandi. U ushbu lavozimni egallagan birinchi ayol boʻldi.
2017 yilda diplomat BMT Bosh Assambleyasining 72-sessiyasi vitse-prezidentlaridan biri boʻlgan, shuningdek, "BMT-ayollar" tuzilmasining Ijroiya kengashini boshqargan.
Diplomatik karyerasini boshlashdan oldin Nuseybe Parijda YUNESKO konsultanti va Fors koʻrfazi mamlakatlari tadqiqot markazida xavfsizlik va terrorizm boʻyicha dastur tahlilchisi boʻlib ishlagan.
2026 yil oktyabr oyida BAE prezidenti Muhammad bin Zaid Ol Nahayon uning nomzodini BMT bosh kotibi lavozimiga rasman ilgari surdi. Nuseybe vakolat muddati yakuniga yetayotgan Antoniu Guterrishning oʻrnini egallashga daʼvogarlik qilmoqda.