Oʻzbekiston Gruziyadan yongʻoq va tsitrus mevalar importiga ruxsat berdi

Oʻzbekiston Gruziyadan yongʻoq va tsitrus mevalarni olib kirishga ruxsat berdi

Fitosanitariya xavfi tahlili natijalariga koʻra, Oʻzbekiston Gruziyadan funduk (oʻrmon yongʻogʻi), bodom va tsitrus mahsulotlarini import qilishga ruxsat berdi.

Bu haqda Oʻzbekiston Oziq-ovqat xavfsizligi qoʻmitasi raisining oʻsimliklar himoyasi va karantini masalalari boʻyicha oʻrinbosari Jamshid Urunovning Gruziya Milliy oziq-ovqat agentligi rahbari oʻrinbosari Zurab Lipartiya bilan onlayn uchrashuvi chogʻida maʼlum boʻldi.

Tomonlar ikki mamlakat oʻrtasidagi fitosanitariya sohasidagi hamkorlikni rivojlantirish, qishloq xoʻjaligi mahsulotlarini oʻzaro yetkazib berish uchun sharoit yaratish va import qilinayotgan tovarlar xavfsizligini taʼminlash masalalarini muhokama qildilar.

Uchrashuv avvalida Jamshid Urunov Oʻzbekistondagi institutsional islohotlar doirasida Oziq-ovqat xavfsizligi qoʻmitasi tashkil etilganini taʼkidladi. Uning soʻzlariga koʻra, bu oziq-ovqat xavfsizligi, fitosanitariya va veterinariya sohalaridagi asosiy vazifalarni yagona davlat boshqaruvi va nazorati tizimida birlashtirish imkonini berdi.

Gruziya tomoni Oʻzbekiston bozoriga keng turdagi qishloq xoʻjaligi mahsulotlarini yetkazib berishdan manfaatdor ekanini bildirdi. Ushbu roʻyxatga olma, tsitrus mevalar, shaftoli, nektarin, golubika (koʻk rezavor), funduk, bodom va boshqa tovarlar kiradi.

Qoʻmitada qayd etilishicha, Oʻzbekistonda amaldagi tartib-taomillarga muvofiq, qishloq xoʻjaligi mahsulotlarining yangi turlarini bozorga olib kirish uchun imkoniyatlar yaratish boʻyicha ishlar olib borilmoqda.

Qoʻmita mutaxassislari tomonidan oʻtkazilgan fitosanitariya xavfi tahlili natijalariga koʻra, Gruziya tomoniga Oʻzbekistonga funduk, bodom va tsitrus mahsulotlarini eksport qilishga ruxsat berildi.

Shu bilan birga, boshqa bir qator Gruziya tovarlarini olib kirish masalasi alohida koʻrib chiqiladi. Gruziya tomoni zarur texnik maʼlumotlarni taqdim etganidan soʻng, oʻzbekistonlik mutaxassislar olma, shaftoli, nektarin va golubika boʻyicha fitosanitariya xavfi tahlilini oʻtkazadilar.

Uning natijalariga koʻra, ushbu turdagi mahsulotlarni Oʻzbekistonga import qilish uchun zarur boʻlgan talablar belgilanadi.

Bundan tashqari, Gruziya tomoni oʻzbekistonlik mutaxassislar ishtirokida qoʻshma inspektsiya tashkil etishga tayyorligini bildirdi.

Ushbu ishlar doirasida Gruziyada qishloq xoʻjaligi mahsulotlari yetishtiriladigan joylar va ularni eksportga tayyorlash bilan shugʻullanuvchi korxonalarning holatini oʻrganish rejalashtirilgan.

Bunday inspektsiyalar mahsulotlarning fitosanitar holatini, ularni ishlab chiqarish va saqlash jarayonlarini, karantin obʼyektlari mavjudligi yoki yoʻqligini, shuningdek, belgilangan fitosanitariya talablariga muvofiqligini bevosita joyida baholash imkonini beradi.

Oʻz navbatida, tegishli fitosanitariya sertifikati mavjud boʻlgan taqdirda, Oʻzbekistondan Gruziya bozoriga qishloq xoʻjaligi mahsulotlarining barcha turlarini yetkazib berish imkoniyati saqlanib qolmoqda.