O‘zbekistondan jo‘natilgan piyoz va sabzi markirovkadagi kamchiliklar tuzatilgach, Qirg‘izistonga kiritilgani ma’lum qilindi

O‘zbekistondan Qirg‘izistonga yuborilgan piyoz va sabzi mahsulotlari markirovkadagi nuqsonlar bartaraf etilgach, mamlakatga kiritilgani ma’lum qilindi.

Avvalroq, O‘zbekistondan eksport qilingan 23 tonna piyoz va 5 tonna sabzi markirovka qoidalariga rioya qilinmagani sababli Qirg‘iziston chegarasida to‘xtatilgan edi. Biroq, Oziq-ovqat mahsulotlari xavfsizligi qo‘mitasining xabar berishicha, ushbu kamchiliklar tuzatilgandan so‘ng, mahsulotlar Qirg‘iziston hududiga kiritilib, sotishga ruxsat berilgan.

Aniqlanishicha, Farg‘ona viloyatida yetishtirilgan piyoz va sabzi “O‘zbekiston” chegara posti orqali Qirg‘izistonga jo‘natilgan. Mahsulot qadoqlarida majburiy markirovka mavjud bo‘lmagani uchun yuk chegarada ushlab qolingan. Yuk egasining so‘zlariga ko‘ra, kamchiliklar bartaraf etilgach, mahsulot Qirg‘iziston hududiga olib kirilgan.

Qirg‘izistonning karantin-fitosanitar qoidalariga muvofiq, mamlakatga olib kiriladigan meva-sabzavot mahsulotlarining har bir qadog‘ida mahsulot nomi, kelib chiqish mamlakati, eksportchi va/yoki reeksportchi haqidagi ma’lumotlar ko‘rsatilishi shart. Bu talablar mahsulotning kelib chiqishini aniqlash, yukni identifikatsiya qilish va fitosanitar nazoratni ta’minlash maqsadida qo‘llaniladi.

Qo‘mita eksportyorlarni mahsulot jo‘natishdan oldin import qiluvchi davlatning markirovka, qadoqlash va boshqa fitosanitar talablarini sinchkovlik bilan tekshirishga chaqirdi. Bu choralar yuklarning chegarada to‘xtatilishining, qo‘shimcha xarajatlarning va eksport jarayonidagi kechikishlarning oldini olishga yordam beradi.