Oʻzbekiston fuqarolarni Janubiy Koreyada tayyorlash va ishga joylashtirish boʻyicha yangi dasturni ishga tushiradi
Prezident Oʻzbekiston fuqarolarini Janubiy Koreyada oʻqitish va ishga joylashtirish boʻyicha yangi uch yillik dasturni eʼlon qildi. Uning soʻzlariga koʻra, asosiy eʼtibor kasb-hunar egallashga qaratiladi. Bundan tashqari, Koreyadagi oʻzbekistonliklarga davlat hisobidan yetakchi oliy oʻquv yurtlarida olti oylik qayta tayyorlov kurslari taklif etiladi.
Oʻzbekiston Janubiy Koreyada fuqarolarni tayyorlash va ishga joylashtirish boʻyicha yangi dasturni ishga tushirmoqchi
15 sentyabr kuni Oʻzbekiston Prezidenti Shavkat Mirziyoyev Janubiy Koreyada ishlayotgan va tahsil olayotgan vatandoshlar bilan uchrashuvda ushbu mamlakatda Oʻzbekiston fuqarolarini tayyorlash va ishga joylashtirish boʻyicha yangi uch yillik dastur ishga tushirilishini eʼlon qildi.
Uchrashuv Prezidentning Koreya Respublikasiga davlat tashrifi doirasida norasmiy muhitda boʻlib oʻtdi. Suhbat davomida taʼlim, kasbiy tayyorgarlik, ishga joylashtirish va vatandoshlar tajribasidan Oʻzbekistonni rivojlantirish yoʻlida foydalanish mavzulari koʻtarildi.
Mirziyoyev taʼlim hamon davlat siyosatining asosiy ustuvor yoʻnalishlaridan biri boʻlib qolayotganini taʼkidladi.
«Kimgadir yoqadi, kimgadir yoqmaydi, lekin men bir gapni aytaman: muallim, muallim, taʼlim, taʼlim, bilim, bilim», — dedi Prezident «Oʻzbekiston 24» telekanali lavhasida.
Uning soʻzlariga koʻra, Oʻzbekiston Janubiy Koreya bilan birgalikda mamlakat fuqarolarini oʻqitish va ularni ishga joylashtirishni oʻz ichiga oluvchi yangi uch yillik dasturni tayyorlashni rejalashtirmoqda.
«Koreya bilan farzandlarimizni bu yerga ishlash va oʻqishga olib kelish boʻyicha yangi uch yillik dastur ishlab chiqamiz. Koʻrib turganingizdek, birinchi masala — kasb-hunar», — dedi Shavkat Mirziyoyev.
Prezident oliy oʻquv yurtlari rahbarlari oldiga nafaqat akademik taʼlimga, balki talabalarning amaliy kasb-hunar egallashiga ham koʻproq eʼtibor qaratish vazifasini qoʻyayotganini taʼkidladi.
«Men hatto oliygoh rektorlariga ham topshiriq beryapman: soat uchgacha darsingni oʻt, soat uchdan keyin esa mening bolalarimga kasb oʻrgat. Kasbi bor odam hech qachon xor boʻlmaydi», — dedi u.
Mirziyoyevning soʻzlariga koʻra, Koreya bilan yangi hamkorlik dasturi mavjud formatlardan farq qiladi.
«Eng katta masala — Koreya bilan uch yillik dastur qilamiz. U mutlaqo boshqacha boʻladi», — dedi Prezident.
Shavkat Mirziyoyev alohida toʻxtalib, Janubiy Koreyadagi Oʻzbekiston fuqarolariga qoʻshimcha taʼlim olish va yangi mutaxassislikni egallash imkoniyatini berish rejalari haqida maʼlum qildi.
Prezidentning soʻzlariga koʻra, bir oy muddatda «El-yurt umidi» jamgʻarmasi vakillari Koreyadagi vatandoshlar bilan uchrashishlari kerak.
«Sizlarga tegishli bitta nozik masala bor. Bir oy ichida huzuringizga Prezident jamgʻarmasi, „El-yurt umidi“ jamgʻarmasi vakillari borib, hammangiz bilan gaplashadi», — dedi u.
Oʻqish yoʻnalishini oʻzgartirish yoki boshqa kasb egallashni istaganlarga Janubiy Koreyaning yetakchi universitetlaridan birida olti oy davomida tahsil olish imkoniyatini berish taklif etilmoqda.
«Agar hozir oʻqiyotgan narsangizdan ozgina koʻnglingiz toʻlmayotgan boʻlsa, ular bilan gaplashing. Men Koreya tajribasi asosida sizlarni yangi kasbga oʻqitish uchun Koreyaning eng yaxshi universitetlariga olti oyga yubormoqchiman. Stipendiyani ham, oʻqishni ham Prezidentning oʻzi toʻlab beradi», — dedi Shavkat Mirziyoyev.
Prezident Oʻzbekistonga qaytgach, ushbu masala boʻyicha alohida qaror qabul qilmoqchi ekanini maʼlum qildi. Kelgusida Koreya tajribasi boshqa mamlakatlarga ham tatbiq etilishi mumkin.
Bundan tashqari, Oʻzbekistonda Janubiy Koreya bilan hamkorlikda beshta loyiha, jumladan, Kia Sonet Prime avtomobillarini ishlab chiqarish va Milliy onkologiya markazi qurilishi boshlandi. Oʻzbekiston Davlat geologiya qoʻmitasi va Koreya Eksimbanki strategik minerallarni qayta ishlash va ularni yetkazib berish zanjirini shakllantirish boʻyicha xab tashkil etish toʻgʻrisida memorandum imzoladilar.