Oʻzbekiston banklariga pul oʻtkazmalarini real vaqt rejimida firibgarlikka tekshirish majburiyatini yuklash kutilmoqda

Oʻzbekiston banklariga pul oʻtkazmalarini firibgarlikka qarshi real vaqt rejimida tekshirish majburiyatini yuklash rejalashtirilmoqda

Oʻzbekistonda banklar, toʻlov tashkilotlari va toʻlov tizimlari operatorlariga shubhali oʻtkazmalar va boshqa operatsiyalarni tunu kun aniqlash majburiyati yuklanishi mumkin. Xavf darajasiga qarab, tranzaktsiya amalga oshirilishi, mijoz tomonidan tasdiqlanishi uchun vaqtinchalik toʻxtatib turilishi yoki rad etilishi mumkin.

Antifrod tizimlari 24/7 rejimida ishlashi hamda operatsiyalarni real vaqt rejimida bir nechta belgilar va skoring asosida tahlil qilishi kerak boʻladi. Agar oʻtkazma vaqtinchalik bloklansa yoki rad etilsa, mijozga zudlik bilan xabar berilishi, sababi tushuntirilishi va keyingi harakatlar haqida maʼlum qilinishi lozim. Loyihada, shuningdek, ijtimoiy injeneriya belgilari — firibgarlar aldov yoki bosim yoʻli bilan shaxsni mustaqil ravishda operatsiyani amalga oshirishga koʻndirgan holatlar aniqlanganda, qoʻshimcha tekshiruv oʻtkazish ham koʻzda tutilgan.

Banklar va toʻlov tashkilotlariga shubhali operatsiyalar hamda yangi firibgarlik sxemalari haqida oʻzaro maʼlumot almashish, Markaziy bankka yirik intsidentlar toʻgʻrisida xabar berish va tunu kun mijozlar murojaatlarini qabul qilish majburiyatini yuklash ham rejalashtirilmoqda. Antifrod modellarini har chorakda kamida bir marta tekshirish nazarda tutilgan. Loyihaning jamoatchilik muhokamasi 9 oktyabrgacha davom etadi.

Avvalroq Oʻzbekistonda InfoCards tizimi ishga tushirilgan boʻlib, u orqali bank kartalari egalari kartalari kim tomonidan va nima sababdan bloklanganini bilib olishlari mumkin. Endilikda ushbu maʼlumotni olish uchun xizmat koʻrsatuvchi bankka murojaat qilish kifoya.