Norvegiyada Ukraina talabi bilan Rossiya kemasi qo‘lga olindi

Norvegiyada Ukraina so‘rovi asosida Rossiya kemasi qo‘lga olindi

Norvegiyaning Nord-Troms okrug sudi 31-avgust kuni Ukrainaning “Naftogaz” kompaniyasi da’vosini qanoatlantirdi. Sud Shpitsbergen arxipelagidagi Barentsburg shahrida joylashgan Rossiyaning “Professor Molchanov” tadqiqot kemasini qo‘lga olish haqida qaror chiqardi.

Ma’lum bo‘lishicha, 2-sentyabr kuni Shpitsbergen gubernatori kemani musodara qilgan. Kema alohida ko‘rsatma berilgunga qadar Barentsburgda langar tashlab turadi. Hokimiyat bayonotiga ko‘ra, gubernator Arktikugol tresti bilan birgalikda kema bortidagi ekipaj va yo‘lovchilar holidan xabar olib turadi.

Gubernator saytida tushuntirilishicha, kemaning qo‘lga olinishi “Naftogaz” kompaniyasining 2014-yilda Rossiya tomonidan tortib olingan mablag‘larni qaytarish bo‘yicha olib borayotgan kurashining bir qismidir.

Rossiyaning Uzoq Sharq va Arktikani rivojlantirish vaziri Aleksey Chekunkov Norvegiya sudining qarorini “G‘arb mamlakatlarining qonunlarni mensimasligi va o‘zboshimchaligining navbatdagi isboti” deb baholadi.

“Biz Norvegiyaning Shpitsbergen arxipelagida 95 yildan beri mavjudmiz. U yerda Arktikugol tresti 1931-yildan beri faoliyat yuritmoqda. Rosgidrometning ‘Professor Molchanov’ kemasi kompaniyamiz bilan aloqa o‘rnatish uchun ishlatilgan”, deb tushuntirdi Chekunkov.

U Arktikugol tresti Norvegiya sudining kema qo‘lga olinishi bo‘yicha qarori ustidan shikoyat qilishini qo‘shimcha qildi. Rossiya Tashqi ishlar vazirligi matbuot kotibi Mariya Zaxarova kemaning qo‘lga olinishiga javoban Rossiya “tegishli tarzda javob qaytarishini” bildirdi.

“Professor Molchanov” qutb va okeanografik tadqiqotlar o‘tkazuvchi ilmiy-tadqiqot kemasidir. U Shimoliy gidrometeorologiya va atrof-muhitni monitoring qilish boshqarmasi flotiga kiradi. 2025-yildan beri kema Murmansk va Barentsburg portlari o‘rtasida muntazam qatnab keladi.

U Shpitsbergenga turistlar, olimlar, Arktikugol tresti xodimlari va ularning oilalarini tashib kelgan. 2026-yil uchun shunday sayohatlardan 10 tasi rejalashtirilgan edi.