Niderlandiya 2026 yilgi boykotdan keyin Yevrovideniyega qaytadi
Mamlakat bu yilgi tanlovda ishtirok etmadi, ammo kelasi yili Bolgariyada boʻlib oʻtadigan tanlovga qaytadi.
Niderlandiya, ilgari mamlakatning tanlovdagi ishtirokini taʼminlab kelgan telekanal boykotiga qaramay, kelasi yili «Yevrovideniye» qoʻshiq tanloviga qaytadi.
Niderlandiya oxirgi marta 2025 yilda «Yevrovideniye»da ishtirok etgan boʻlib, oʻshanda mamlakat sharafini Klod himoya qilgan edi.
Niderlandiyaning Avrotros teleradiokompaniyasi 2026 yilda tanlovda ishtirok etishdan bosh tortdi va Isroilning ishtiroki hamda Gʻazodagi urush atrofidagi bahs-munozaralar fonida tanlovni «endilikda betaraf deb hisoblab boʻlmasligini» roʻkach qilib, 2027 yilgi tanlovni ham oʻtkazib yuborishini maʼlum qildi.
Niderlandiyadagi jamoatchilik teleradioeshittirishlarini nazorat qiluvchi NPO tashkiloti endilikda ushbu vazifani oʻz zimmasiga oldi va tanlov NOS teleradiokompaniyasi tomonidan namoyish etilishini, Niderlandiya vakilini esa mustaqil hayʼat tanlashini bildirdi.
NPO media direktori Yurre Bosman shunday dedi: «Jamoatchilik teleradiokompaniyasi sifatida, ayniqsa, hozirgi vaqtda ushbu birlashtiruvchi Yevropa tadbirining bir qismi boʻlib qolishimiz muhimdir».
Isroilning ishtiroki qizgʻin bahs-munozaralarga sabab boʻldi va beshta davlat, jumladan Niderlandiya ham bu yilgi tadbirni boykot qildi.
Avgust oyida «Yevrovideniye» tashkilotchisi boʻlmish Yevropa teleradioeshittirishlar ittifoqi (EBU) qurolli mojaroda ishtirok etayotgan har qanday mamlakatga tanlovga mezbonlik qilishni taqiqlashini maʼlum qilgan edi.
Bu Isroilning hali ham ishtirok etishi mumkinligini, ammo gʻalaba qozongan taqdirda, uning nomidan boshqa bir mamlakat mezbonlik qilishi kerakligini anglatadi.
EBU, shuningdek, ovoz berish tizimiga oʻzgartirishlar kiritishni taklif qilib, siyosiy motivlarga asoslangan ovoz berish «barqaror tus olganini» va bu keng jamoatchilik tomonidan «chuqur tashvishli» holat sifatida baholanayotganini aytdi.
Biroq, Avrotros ushbu oʻzgarishlar «"Yevrovideniye" qoʻshiq tanlovining mustaqil va betaraf xususiyati tiklanganiga yetarlicha ishonch hosil qilmasligini» bildirdi.
Chorshanba kungi bayonotida NPO tashkiloti EBU tanlov «qoidalari boʻyicha muhim qadamlar qoʻyganini» maʼlum qildi.
Tanlov Niderlandiyada «turlicha hissiyotlar» uygʻotishini tan olgan holda, NPO «EBUdan festivalning birlashtiruvchi xususiyatini yana bir bor tadbirning muhim qismiga aylantirishni qatʼiy soʻraganini» aytdi.
NPO, shuningdek, Niderlandiya vakili «mustaqil ekspertlar guruhi» tomonidan tanlanishini va ular «chiqish bilan bogʻliq jarayonni diqqat bilan yoʻnaltirib borishini» bildirdi.
Islandiya, Ispaniya, Irlandiya va Sloveniya ham Niderlandiya qatorida 2026 yilgi tanlovda ishtirok etishdan bosh tortgan edi.
2027 yilgi tanlov 14 may kuni Burgasda boʻlib oʻtadi, bunga bolgariyalik xonanda Daraning bu yilgi tanlovda «Bangaranga» qoʻshigʻi bilan gʻolib chiqqani sabab boʻldi.
«Yevrovideniye» direktori Martin Grin oʻz bayonotida shunday dedi: «Biz Niderlandiyani 2027 yilda "Yevrovideniye" qoʻshiq tanloviga qayta bagʻrimizga olishdan mamnunmiz.
Biz NPO bilan olib borgan konstruktiv muloqotlarimizni yuqori baholaymiz va Tanlovni "Musiqa bilan birlashganmiz" ruhini chinakam aks ettiradigan makon sifatida mustahkamlash uchun birgalikda ishlashni intiqlik bilan kutamiz».