Muzlatkich eshigida saqlash mumkin bo‘lmagan 7 ta mahsulot
Muzlatkich eshigida saqlash tavsiya etilmaydigan 7 mahsulot
Muzlatkich eshigi kuniga bir necha marta ochilib-yopiladi, bu esa ichki haroratning o‘zgarishiga olib keladi. Bunday harorat tebranishlari ayrim mahsulotlar uchun zararli bo‘lib, bakteriyalar ko‘payishiga, mahsulotning buzilishiga va ta’mning o‘zgarishiga sabab bo‘lishi mumkin. Quyida muzlatkich eshigida saqlash mumkin bo‘lmagan 7 ta mahsulot haqida ma’lumot beriladi.
**1. Tuxum**
Ko‘pgina muzlatkichlarda tuxum uchun maxsus bo‘lim bo‘lsa-da, bu ko‘proq marketing usuli hisoblanadi. Tuxum harorat o‘zgarishiga juda sezgir. Eshik tez-tez ochilganda tuxum qobig‘ida kondensat hosil bo‘ladi, bu esa mikroblarning mayda yoriqlar orqali ichkariga kirishiga sharoit yaratadi.
*Qayerda saqlash kerak:* O‘rta javonda, orqa devorga yaqin joyda.
**2. Sut**
Sut tez aynuvchi mahsulotlardan biridir. Eshikning doimiy ochilib-yopilishi eshik javonidagi haroratni tez-tez o‘zgartiradi, bu esa sutning tez buzilishiga olib keladi. Ayniqsa, issiq kunlarda bu jarayon bir necha barobar tezlashadi.
*Qayerda saqlash kerak:* Asosiy kameraning chuqur qismida, iloji bo‘lsa, eng pastki javonda, chunki bu yer muzlatkichning eng sovuq joyidir.
**3. Yogurt**
Kichik stakan yoki idishlardagi yogurtlarni eshikka qo‘yish qulaydek tuyulishi mumkin, ammo bu ham noto‘g‘ri.
*Qayerda saqlash kerak:* Sut bilan bir qatorda – pastki yoki o‘rta javonda, orqa devorga yaqin joyda.
**4. Pishloq**
Pishloqlar ham haroratning "sovuq-issiq-sovuq" tarzda o‘zgarishiga chidamli emas. Bu ularning ta’mini o‘zgartirishi yoki taxirlashiga olib kelishi mumkin.
*Qayerda saqlash kerak:* O‘rta javonda, yopiq idishda.
**5. Kolbasa mahsulotlari**
Xom go‘sht, tovuq va baliq odatda eshikka sig‘maydi, ammo ba’zilar tilim kolbasa va sosiska mahsulotlarini eshik javoniga qo‘yadi. Bunday joy xavfli bakteriyalar ko‘payishi uchun qulay muhit yaratishi mumkin.
*Qayerda saqlash kerak:* Maxsus go‘sht bo‘limida yoki pastki javonda.
**6. Smetana, qaymoq yoki tuxum asosidagi souslar**
Sut yoki tuxum qo‘shilgan souslar (masalan, mayonez) juda nozik va tez buziladigan mahsulotlardir. Muzlatkich eshigida ular bakteriyalar tarqalishi uchun ideal sharoit yaratadi.
*Qayerda saqlash kerak:* Muzlatkich ichida, orqa devorga yaqin joyda. Qopqog‘ini mahkam yopishni unutmang.
**Unda muzlatkich eshigida nimalarni saqlash mumkin?**
* Ketchup, xantal, soya sousi
* Sirka, sut/tuxum qo‘shilmagan souslar
* Konservalar
* Tuzlangan bodring
* Germetik idishdagi ichimliklar
* Sariyog‘ – unda yog‘ ko‘p, namlik kam bo‘lgani sababli, u sutga qaraganda bakteriyalar tarqalishiga kamroq moyil bo‘ladi.