Musiqa maydonchasi Facebook’ning yangi obunasiga qarshi chiqdi
Bilstondagi «The Robin» muassasasi Facebook’da oʻz tadbirlarini targʻib qila olish uchun pul toʻlamasligini maʼlum qildi.
Musiqa maydonchasi Facebook’ning yangi obunasini tanqid qildi
The Robin vakili Jek Xeffernanning aytishicha, Meta platformadagi bepul funktsiyalarni «qayta sotmoqda»
Mustaqil musiqa maydonchasi Facebook’da oʻz tadbirlarini targʻib qilish uchun yangi obuna xizmatiga «mutlaqo» pul toʻlamasligini maʼlum qildi.
Ushbu platforma, shuningdek Instagram egasi boʻlgan Meta kompaniyasi Meta One deb nomlangan yangi obunani ishga tushirdi. Unga koʻra, toʻlov amalga oshirilmasa, joylashtiriladigan veb-sayt havolalari soni cheklanadi (ikkitadan koʻp boʻlmasligi kerak).
Bilstondagi The Robin musiqa maydonchasining marketing menejeri Jek Xeffernanning aytishicha, maydoncha hozirgidek postlar joylashtirishni davom ettirishi uchun 370 funt sterling toʻlashi kerak boʻladi.
Uning soʻzlariga koʻra, bu yirik korxonalar uchun muammo tugʻdirmaydi, lekin kichikroqlariga qattiq zarba beradi.
Xeffernan Meta tomonidan oʻzgarishlar qilinayotganidan xabardor boʻlganini va bu gʻoya dekabr oyidan beri «aylanib yurganini» aytdi, biroq u kompaniya bu borada juda shaffof boʻldi deb hisoblamaydi.
Maydoncha boshqa ijtimoiy tarmoq platformalaridan ham foydalangan va katta elektron pochta tarqatmalari roʻyxatiga ega, dedi Xeffernan
«Biz ishga keldik, dam olish kunlaridan qolgan narsalarni yigʻishtirishni boshladik, dam olish kunlaridagi shoulardan baʼzi kontent va videolarni rejalashtira boshladik va toʻsatdan "siz bu havolani joylashtira olmaysiz" degan yozuv chiqdi», dedi u.
«Men "oh, bu tushunarsiz-ku?" deb oʻyladim. Buni oʻrganib chiqdim va nima bilan toʻqnash kelganimni bilish uchun umumiy xarajatlarga qaradim. Keyin biz joylashtiradigan barcha havolalarimizni chiqarish uchun qancha toʻlashimiz kerakligini koʻrganimda... eng katta paket uchun 500 dollar toʻlashimiz kerak ekan».
Uning aytishicha, bu oʻzgarish koʻp odamlarga taʼsir qiladi va u «bu kelajakda standartga aylanishini» koʻrmoqda, keyinchalik alohida shaxslar ham bundan jabr koʻrishi mumkin.
Maydoncha 370 funt sterlingni «mutlaqo» toʻlamaydi, deya qoʻshimcha qildi u.
«Buyuk Britaniyadagi oʻrtacha kichik biznes Facebook reklamalari uchun oyiga 500 dan 3000 funt sterlinggacha toʻlaydi, shunday ekan, nega biz yana koʻproq toʻlashga majbur boʻlishimiz kerak?»
Uning aytishicha, bu ularga qanday taʼsir qilishini «kutish va koʻrish» kerak, chunki hamma «bir qayiqda».
Geekout Newsletter ijtimoiy tarmoqlar tahlilchisi Mett Navarraning aytishicha, toʻlovlar hali ommaviy tus olgani yoʻq, obunalar hozirda professional kontent yaratuvchilar va biznes vakillariga qaratilgan boʻlib, ularga Instagram’da havolalar joylashtirish imkoniyati — yangi funktsiya taklif etilmoqda.
Maydoncha 1998 yilda ochilgan boʻlib, 700 kishiga moʻljallangan
«Ammo bu kichikroq korxonalarga zarar yetkazadi — Coca Cola kabilar oyiga 300 yoki 400 dollar toʻlashdan tashvishlanmaydi, lekin burchakdagi doʻkon yoki goʻzallik saloni bor odam bu qiyinchilikni his qiladi».
Uning aytishicha, Meta koʻproq havolalar joylashtirish imkoniyati uning pullik obunalarini qimmatliroq qiladimi-yoʻqmi, shuni sinab koʻrmoqda. Shu bilan birga, kompaniya yangi doimiy daromad manbalarini izlamoqda, chunki u «sunʼiy intellekt urushida gʻalaba qozonish poygasida qolish uchun» SIga «haddan tashqari koʻp» mablagʻ sarflamoqda, bu hozirgacha deyarli 145 milliard dollarni tashkil etdi.
Xeffernanning aytishicha, maydoncha yaxshi yoʻlga qoʻyilgan va boshqa ijtimoiy tarmoqlarda katta auditoriyaga ega, ammo Facebook va Instagram ularning auditoriyasi uchun eng yaxshi ishlaydigan platformalardir.
«Odamlar uchun "buni aylanib oʻtish yoʻli bormikan?" deb izlanish ancha tashvishli boʻlmoqda», deya qoʻshimcha qildi u.
«Aslida ular platformadan bepul funktsiyalarni, jumladan verifikatsiya postlari va havolalarni olib tashlashdi va ularni shunchaki sizga qayta sotishmoqda».