Meksikada ko‘ylak kiygan ulkan skelet Ginnes rekordini o‘rnatdi (video)
Meksikada Marhumlar kuni munosabati bilan 11 qavatli bino balandligidagi Katrina haykali yasaldi. Uni yig‘ishda 140 ga yaqin usta qatnashgan.
Meksikada ko‘ylak kiygan ulkan skelet Ginnes rekordini o‘rnatdi (video)
Meksika poytaxtida Marhumlar kuni munosabati bilan dunyodagi eng baland Katrina haykali o‘rnatilib, Ginnes rekordi qayd etildi. Mexiko shahrining bosh maydoniga qo‘yilgan ayol skeleti shaklidagi haykalning balandligi 33,411 metrga yetadi.
Og‘irligi 100 tonnadan ortiq bo‘lgan haykal po‘lat, shisha tolasi va papye-mashedan tayyorlangan. Popular Science ma’lumotiga ko‘ra, uni yig‘ishda qariyb 140 nafar usta ishtirok etgan.
Katrina — Meksika madaniyatidagi mashhur timsol. Uni rassom Xose Gvadalupe Posada yaratgan. Ko‘ylak va keng soyabonli shlyapa kiygan skelet o‘limga kinoyali yondashuvni hamda o‘lim oldida barcha insonlar teng ekanini anglatadi.
Meksikada Marhumlar kuni har yili 1–2-noyabr kunlari nishonlanadi. Shu kunlarda aholi vafot etgan yaqinlarini yodga oladi. Bayram mamlakatning eng muhim milliy an’analaridan biri sanaladi. 2003-yilda YUNESKO uni insoniyatning nomoddiy madaniy merosi sifatida tan olgan.