Luis Enrike “PSJ”ning muvaffaqiyatsiz startidan xavotirda emas — Reuters
Luis Enrike “PSJ”ning muvaffaqiyatsiz startidan xavotirda emas — Reuters
“PSJ” bosh murabbiyi Luis Enrike jamoaning yangi mavsumni omadsiz boshlaganidan xavotirda emasligini aytdi.
Parij klubi Fransiya chempionatidagi dastlabki uchta o‘yinda g‘alaba qozona olmadi. “Monako”ga qarshi so‘nggi bahsda 1:2 hisobida mag‘lub bo‘lgan “PSJ” mavsumni so‘nggi 19 yildagi eng yomon start bilan boshladi.
Shunga qaramay, ispaniyalik mutaxassis jamoa o‘yinidan xavotir olishga asos yo‘qligini ta’kidladi.
“Xavotirlanishga hech qanday sabab yo‘q. “Monako” darvozamiz tomon nechta aniq zarba yo‘lladi? Ikkita. Nechta gol urdi? Ikkita. Mavsum oxirida vaziyat qanday bo‘lishini ko‘ramiz”, deydi Enrike.
Murabbiy fikricha, faqat natijaga qarab xulosa chiqarish to‘g‘ri emas. Uning aytishicha, “PSJ” “Monako”ga qarshi uchrashuvda yuqori pressingli o‘yinni yaxshi yo‘lga qo‘ygan, biroq jamoaga omad yetishmagan.
“Agar “Monako” bizga qarshi shunday uslubda 10 marta o‘ynasa, sakkizta uchrashuvda biz g‘alaba qozonamiz, bittasida durang qayd etiladi va faqat birida mag‘lub bo‘lamiz. Bu aynan o‘sha mag‘lubiyat bo‘ldi”, deydi ispaniyalik mutaxassis.
“PSJ” uch turdan keyin bor-yo‘g‘i ikki ochko to‘plagan va peshqadamdan yetti ochkoga ortda qolmoqda. Bu parijliklarning 2007/08-yilgi mavsumdan beri chempionatdagi eng omadsiz starti hisoblanadi.
Luis Enrike jamoa yuzaga kelgan farqni imkon qadar tezroq qisqartirishga urinishi kerakligini aytdi.
Ma’lumot uchun, 56 yoshli Luis Enrike 2023-yildan buyon “PSJ”ni boshqarib kelmoqda. U Parij klubi bilan uch marta Fransiya chempionati, uch marta Fransiya Superkubogi, shuningdek, ikki marta mamlakat kubogida zafar quchgan. Bundan tashqari, ispaniyalik mutaxassis ikki marta Yevropa Chempionlar Ligasi, ikki marta Yevropa Superkubogi hamda bir marta FIFA Qit’alararo Kubogini qo‘lga kiritgan.
“PSJ” 9-sentyabr kuni Chempionlar ligasining navbatdagi mavsumidagi ilk uchrashuvda “Slovan Bratislava”ni o‘z maydonida qabul qiladi.