Kongo Demokratik Respublikasidagi maktabda yuz bergan yongʻinda 20 dan ortiq bola halok boʻlgan boʻlishi mumkinligidan xavotir bildirilmoqda
Rasmiylarning maʼlum qilishicha, isyonchilar nazoratidagi sharqiy Bukavu shahrida ikkita maktabni qamrab olgan yongʻindan qochish paytida tiqilinch yuzaga kelgan.
Kongodagi maktab yongʻinida 20 dan ortiq bola halok boʻlgani taxmin qilinmoqda
Yongʻin oʻchirilgan koʻrinadi, ammo tutayotgan xarobalar qolgan
Kongo Demokratik Respublikasi sharqidagi isyonchilar nazoratida boʻlgan Bukavu shahrida ikkita maktabni qamrab olgan yongʻindan qochishga urinish paytida yuzaga kelgan tiqilinchda kamida 24 nafar maktab oʻquvchisi halok boʻlgani taxmin qilinmoqda, deb xabar berdi mahalliy yuqori lavozimli mulozim.
Yongʻinda kattalar ham halok boʻlgani xabar qilingan va aholi zich joylashgan Kadutu kommunasida qurbonlar soni yanada ortishi mumkinligidan xavotirlar bor.
Omon qolganlar yaqin atrofdagi shifoxonalarga yetkazilgan, voqea joyidan olingan videolarda shifoxona pollarida ogʻriqdan azob chekib yotgan bolalar aks etgan.
Yongʻin oqibatida 300 ga yaqin uy ham vayron boʻlgan, uning kelib chiqish sabablari hozircha nomaʼlum.
Ijtimoiy tarmoqlarda tarqatilgan suratlarda yerda harakatsiz yotgan yosh bolalarni koʻrish mumkin.
Reuters axborot agentligi iqtibos keltirgan guvohning soʻzlariga koʻra, tushdan keyin yongʻin oʻchirilgan, biroq vayronalar va toʻlqinsimon tunukalar orasidan hali ham tutun koʻtarilmoqda edi.
Janubiy Kivu provintsiyasining poytaxti va KDRning tepalikda joylashgan eng gavjum shaharlaridan biri boʻlgan Bukavu oʻtgan yilning fevral oyida M23 isyonchilari tomonidan egallab olingan edi.
Isyonchilar tomonidan tayinlangan rasmiylar vaziyatni baholayotganliklarini va bugun kechqurun qurbonlarning dastlabki sonini eʼlon qilishlarini aytmoqda.
Shu bilan birga, Kinshasadagi hukumat qurbonlar sonini ochiqlamasdan, X tarmogʻida bayonot berdi.
«Milliy taʼlim va yangi fuqarolik vazirligi halokatli yongʻin munosabati bilan chuqur qaygʻurishini bildiradi», deyiladi xabarda.
«Bir necha kishi halok boʻlgani va koʻplab odamlar jarohatlangani sababli, qurbonlar soni hozircha dastlabki hisoblanadi. Vazir taʼziya izhor etdi, oilalar bilan birdamligini bildirdi va oʻqish davomiyligini taʼminlash uchun zarar koʻrgan maktablarni baholashni buyurdi».
Ushbu fojia oʻtgan dam olish kunlari Kinshasada sodir boʻlgan shunga oʻxshash yongʻindan keyin yuz berdi, u yerda toʻy marosimlari zalidagi tiqilinchda mahalliy aholi vakillari halok boʻlgan edi.
Bunga javoban hukumat qatʼiy xavfsizlik choralarini koʻrishni buyurdi va jamoat joylarida standartlarga rioya etilishini taʼminlash uchun butun mamlakat boʻylab guruhlarni yubordi.