Kanadalik afsonaviy bokschi Jorj Chuvalo 89 yoshida vafot etdi
Ogʻir vazn toifasidagi chempion Muhammad Ali va Jo Freyzer kabilar bilan jang qilgan va biror marta ham nokautga uchramagani yoki yiqilmagani bilan tanilgan edi.
Afsonaviy kanadalik bokschi Jorj Chuvalo 89 yoshida vafot etdi
Ogʻir vazn toifasida besh karra Kanada chempioni, kanadalik bokschi Jorj Chuvalo 89 yoshida vafot etdi.
Faoliyati davomidagi 93 ta professional jangda — 73 ta gʻalaba, 18 ta magʻlubiyat va ikkita durang — Chuvalo biror marta ham ringga yiqilmagan (nokdaunga uchramagan).
«Uning suratlari oʻnlab yillar davomida devorlarimizda osilib turdi. Uning hikoyalari jangchilarning bir avlodidan ikkinchisiga oʻtib keldi», — deyiladi u mashgʻulot oʻtkazgan Torontodagi «Sully's Boxing» zali bayonotida.
U 1966 va 1972 yillarda Muhammad Ali bilan jang qilgan va garchi Chuvalo har ikki jangda magʻlub boʻlgan boʻlsa-da, Ali uni oʻzi toʻqnash kelgan eng matonatli inson deb taʼriflagan.
Chuvalo 1937 yilda xorvatiyalik muhojirlar oilasida tugʻilgan, Torontoda ulgʻaygan va yoshligidan boks bilan shugʻullana boshlagan.
Keng jamoatchilik tomonidan «Kanadaning eng buyuk jangchisi» deb eʼtirof etilgan Chuvalo oʻzining «temir jagʻi», tinimsiz matonati hamda Jorj Forman, Jo Freyzer va Ali kabi dunyoga mashhur jangchilarga qarshi janglari bilan tanilgan edi.
«Jorj Chuvalo ogʻir vazndagi boks afsonasi, oilamiz doʻsti va Kanada ramzi edi», — deb yozdi Ontario bosh vaziri Dag Ford ijtimoiy tarmoqlarda.
«Uning vafoti munosabati bilan qaygʻurar ekanmiz, xayolim va duolarim Jorjning butun oilasi va yaqinlari bilan birga».
1978 yilda professional boksdagi faoliyatini yakunlagandan soʻng, Chuvalo mamlakat boʻylab maʼruzachi sifatida sayohat qilib, giyohvandlikka qarshi taʼlim va ruhiy salomatlik targʻiboti bilan shugʻullandi.
Chuvalo giyohvandlik moddalarining dozasini oshirib yuborish va oʻz joniga qasd qilish oqibatida uch oʻgʻli va rafiqasidan ayrilganini aytgan edi.
«Agar qachondir giyohvand moddalarni isteʼmol qilish fikri sizni vasvasaga solsa yoki bunga moyillik sezsangiz, meni, Jorj Chuvaloni va giyohvandlik mening oilamga nima qilganini eslashingizni istardim», — degan edi u bir safar, CBC Radio'ning 1998 yildagi xabariga koʻra.
Nafaqaga chiqqanidan keyin Chuvalo oʻzini aktyorlikda ham sinab koʻrdi, 1998 yildagi «Dirty Work» komediyasida va 1986 yildagi «The Fly» dahshatli filmida Jeff Goldblum bilan birga suratga tushdi.
U shuningdek, yirik boks janglarida mehmon sharhlovchi boʻlib ishladi va doʻsti hamda hamkasbi Charlz «Oʻrgimchak» Jons bilan birga «Greatest Knockouts» nomli televizion boks koʻrsatuviga boshlovchilik qildi.
Chuvalodan toʻngʻich oʻgʻli Mitch, qizi Vanessa, nabiralari va ikkinchi rafiqasi Joanna qoldi.
U shanba kuni, oʻz tugʻilgan kunida vafot etdi, deb xabar berdi «Sully's Boxing Gym».