Jahon iqtisodiyotiga yangi tahdid: Yamandagi husiychilar Bob-al-Mandabni toʻsib qoʻymoqchi
Tramp husiychilarga zarba berishni rad etgan.
Jahon iqtisodiyotiga yangi xavf: Yamandagi husiychilar Bob-al-Mandabni to‘sib qo‘ymoqchi
Yakunlanayotgan haftaning ikkinchi yarmida jahon axborot agentliklari Yamandagi qonuniy hukumatga tayangan muxolifatdagi husiychilar Bob-al-Mandab bo‘g‘ozidan 80 kilometr uzoqlikdagi Moha shahrini egallagani haqida xabar berdi.
Guvohlarning aytishicha, Eron tomonidan qo‘llab-quvvatlanadigan husiychilar otryadlari shaharga kirib, «Amerikaga o‘lim, Isroilga o‘lim!» deya hayqirishgan.
AFP agentligi ma’lumotiga ko‘ra, hafta boshidan beri davom etayotgan to‘qnashuvlarda 500 dan ortiq kishi halok bo‘lgan, o‘n minglab odamlar uylarini tark etgan.
Husiychilarning oldinga siljishi Saudiya Arabistoni hududiga yo‘naltirilgan zarbalar bilan birga kechmoqda. Saudiya koalitsiyasi ma’lumotiga ko‘ra, isyonchilar ballistik raketalar va dronlar yordamida Abha, Hamis-Mushayt va Jizan shaharlariga hujum qilgan. Ar-Riyod ham bunga yopirilma havo zarbalari bilan javob qaytargan.
Hafta oxiriga kelib husiychilar Perim oroliga yetib borgani haqida ham xabar tarqaldi. Bu orol Osiyo va Yevropani bog‘lovchi savdo yo‘lining janubiy darvozasi hisoblangan Bob-al-Mandab bo‘g‘ozini ikkiga ajratib turadi.
Bundan avval Yamandagi Saudiya tomonidan qo‘llab-quvvatlanadigan qonuniy hukumat manbalari hukumat kuchlari Perim orolini tark etgani, husiychilar esa Qizil dengiz sohilidagi Zurab shahrini egallagani haqida xabar bergan edi. Ushbu shahar orol ro‘parasida joylashgan.
Hozircha husiychilarning o‘zi Perim orolini egallab olgani haqida rasman e’lon qilmagan.
Husiychilar qurolli kuchlari vakili Yahyo Saria o‘z telegram-kanalida guruh tez orada «jiddiy oqibatlarga olib keladigan keng ko‘lamli harbiy operatsiya» e’lon qilishini yozgan.
Hozirgi keskinlashuv 2022-yildan beri Yamandagi fuqarolik urushini to‘xtatib turgan mo‘rt bitimni butunlay yo‘qqa chiqarishi mumkin. Ushbu mamlakatdagi harbiy to‘qnashuvlar 2014-yilda husiychilar poytaxt Sanoni egallab olganidan keyin boshlangan, 2015-yil martida esa Saudiya Arabistoni boshchiligidagi arab koalitsiyasi ham mojaroga tortilgan.
Bugungi kunda husiychilar mamlakatdagi eng yirik harbiy kuch hisoblanadi va Yaman aholisining taxminan 50-60 foizi yashaydigan hududlarni o‘z nazoratiga olgan.