IT Park Uzbekistan yoshlarni ish bilan taʼminlash imkoniyatlarini kengaytirmoqda

IT Park Uzbekistan yoshlarni ish bilan taʼminlash imkoniyatlarini kengaytirmoqda

IT Park Uzbekistan mahalliy va xalqaro kompaniyalar uchun yagona nomzodlar bazasini yaratgan holda, butun mamlakat boʻylab mutaxassislar, talabalar va bitiruvchilar uchun ishga joylashish imkoniyatlarini kengaytirmoqda.

Roʻyxatdan oʻtgan ish izlovchilarning rezyumelari, mos boʻsh ish oʻrinlari mavjud boʻlganda va mutaxassislarga soʻrov tushganda, kompaniyalarga, shu jumladan IT Park Uzbekistan rezidentlariga taqdim etilishi mumkin.

Bazada nomzodlarning kasbiy tajribasi, ixtisosligi, chet tillarini bilishi va afzal koʻrgan bandlik shakli hisobga olinadi. Tashabbus Oʻzbekistonning barcha hududlarini qamrab oladi va ish beruvchilarga nafaqat Toshkentdan, balki boshqa hududlardan ham mutaxassislarni koʻrib chiqish imkoniyatini beradi.

Kompaniyalarning talabi nafaqat anʼanaviy IT-kasblarga tegishli. Talab yuqori boʻlgan mutaxassislar qatorida dasturchilar, QA-muhandislar, maʼlumotlar bilan ishlovchi mutaxassislar va dizaynerlar, shuningdek, marketing, sotuv, mijozlarga xizmat koʻrsatish, moliya, buxgalteriya hisobi va maʼmuriy boshqaruv sohalari xodimlari bor.

BPO va call-markazlar uchun kadrlar tanlash alohida yoʻnalish boʻlib qolmoqda. Xalqaro bozorlar va xorijiy mijozlar bilan ishlovchi kompaniyalar ham chet tillarini biladigan mutaxassislarga qiziqish bildirmoqda. Xususan, ingliz, rus, nemis, frantsuz, ispan, turk, arab, xitoy, yapon va koreys tillarini biladigan nomzodlarga talab katta.

Ish beruvchining talablariga qarab, ish izlovchilarga ofisdan, gibrid yoki masofaviy ish shakli taklif qilinishi mumkin. Bu hududlardagi mutaxassislarning imkoniyatlarini kengaytiradi va kompaniyalarga Toshkentdan tashqarida ham xodimlarni izlash imkonini beradi.

Bazani shakllantirish vositalaridan biri Talent Park loyihasidir. Ish izlovchilar ixtisoslashtirilgan bot orqali rezyume yuborishlari hamda oʻz tajribasi, koʻnikmalari va kasbiy yoʻnalishi haqidagi maʼlumotlarni koʻrsatishlari mumkin. Mos boʻsh ish oʻrinlari paydo boʻlganda, nomzodning profili yirik mahalliy va xalqaro kompaniyalarga, jumladan IT Park Uzbekistan rezidentlariga koʻrib chiqish uchun taqdim etilishi mumkin.

Kariyera imkoniyatlari va ochiq boʻsh ish oʻrinlari toʻgʻrisidagi dolzarb maʼlumotlar loyihaning Telegram-kanalida ham eʼlon qilib boriladi.

Bazada roʻyxatdan oʻtish avtomatik tarzda ishga joylashishni anglatmaydi va boʻsh ish oʻrnini kafolatlamaydi. Shu bilan birga, bu mutaxassislarga oʻz kasbiy profilini potentsial ish beruvchilarga taqdim etish va keyingi nomzodlar tanlovida ishtirok etish uchun qoʻshimcha imkoniyat beradi.