Istanbulda kuchli suv toshqinlari: O‘zbekiston konsulxonasi ogohlantirish e’lon qildi
Kuchli yomg‘ir, shamol va noqulay ob-havo toshqin, yo‘llarda harakatlanishning qiyinlashishi hamda boshqa favqulodda holatlar xavfini
Istanbulda kuchli suv toshqinlari: O‘zbekiston konsulxonasi ogohlantirish berdi
Istanbul, Yalova va Kojayeli viloyatlarida yashayotgan hamda vaqtincha bo‘lib turgan o‘zbekistonlik fuqarolar ob-havo keskin yomonlashgani sababli hushyor bo‘lishga chaqirildi. Bu haqda O‘zbekistonning Istanbuldagi bosh konsulxonasi ma’lum qildi.
Kuchli yomg‘ir, shamol va noqulay ob-havo sharoitlari suv toshqinlari, yo‘llarda harakatlanishning qiyinlashishi hamda boshqa favqulodda holatlar xavfini keltirib chiqarishi mumkin.
Shu sabab vatandoshlarimizdan quyidagi ehtiyot choralariga amal qilish so‘raladi:
- Zarurat bo‘lmasa, uzoq masofalarga safarga chiqmaslik;
- Kuchli yog‘ingarchilik paytida suv to‘planishi mumkin bo‘lgan pastqam joylar, yerosti yo‘llari va tunnellardan uzoq turish;
- Dengiz sohillari, daraxtlar, elektr uzatish tarmoqlari va mustahkam o‘rnatilmagan konstruksiyalar yonida ehtiyotkorlikni kuchaytirish;
- Avtomobil boshqarishda tezlikni pasaytirish va xavfsiz masofani saqlash;
- Turkiyaning vakolatli idoralari tomonidan e’lon qilinayotgan rasmiy ogohlantirish va tavsiyalarga qat’iy rioya qilish.
15-oktyabrga o‘tar kechasi Istanbulda kuchli yog‘ingarchiliklar oqibatida yer osti yo‘laklari hamda turar-joy binolarini suv bosdi. Xavfli vaziyat sabab Istanbuldagi barcha ta’lim muassasalarida darslar bekor qilindi.