Ipoteka va davolanish uchun. Oʻzbekistonda pensiya jamgʻarmalaridan muddatidan oldin foydalanishga ruxsat berilishi mumkin
Ipoteka va davolanish uchun. Oʻzbekistonda pensiya jamgʻarmalaridan muddatidan oldin foydalanishga ruxsat berilishi mumkin
Oʻzbekiston aholisi kelajakda pensiyaga chiqishdan oldin ham oʻz pensiya jamgʻarmalarini tasarruf etish huquqiga ega boʻlishi mumkin. Ushbu mablagʻlarni ipoteka boʻyicha boshlangʻich badal sifatida va ogʻir kasalliklarni davolashga yoʻnaltirishga ruxsat berish taklif etilmoqda.
Bunday islohot bilan Iqtisodiyot va moliya vazirligi chiqdi. Loyihaga koʻra, 2030 yil 1 yanvardan boshlab pensiya jamgʻarmalarini fuqarolarning toʻlaqonli shaxsiy mulki sifatida — muddatidan oldin foydalanish va meros qilib qoldirish huquqi bilan mustahkamlab qoʻyish rejalashtirilmoqda.
Boshqacha aytganda, shaxsiy pensiya hisobvaragʻida toʻplangan mablagʻlarni pensiya yoshini kutmasdan, ipotekaga uy-joy sotib olishga yoʻnaltirish mumkin boʻladi. Mablagʻlarni muddatidan oldin olish uchun yana bir asos ogʻir kasalliklarni davolash boʻladi.
Bunda meros huquqi jamgʻarmalarning toʻliq summasiga, jumladan, davlat qoʻshimcha toʻlovlari va investitsiya daromadlariga tatbiq etiladi. Agar hisobvaraq egasi vafot etsa, mablagʻlar toʻliq hajmda uning qonuniy merosxoʻrlariga oʻtadi.
Bundan tashqari, fuqarolarga oʻz pensiya jamgʻarmalarini moliyaviy vositalar orqali mustaqil ravishda investitsiya qilish imkoniyatini berish koʻzda tutilmoqda. Olingan foyda pensiya hisobvaragʻiga qaytariladi.
Oʻzgarishlar jamgʻarmalarni boshqarish tizimiga ham daxl qiladi. 2027 yildan boshlab ushbu funktsiyalarni Xalq bankidan byudjetdan tashqari Pensiya jamgʻarmasiga oʻtkazish rejalashtirilmoqda.
Hozirda islohot loyihasi jamoatchilik muhokamasiga qoʻyilgan boʻlib, u 30 sentyabrgacha davom etadi.
Shuningdek, ushbu islohot doirasida pensiya yoshini bosqichma-bosqich oshirish taklif etilmoqda: erkaklar uchun — 60 yoshdan 63 yoshgacha, ayollar uchun — 55 yoshdan 58 yoshgacha.