iPhone 18 Pro Max va Galaxy S26 Ultra mustahkamlik boʻyicha oʻzaro taqqoslandi

iPhone 18 Pro Max va Galaxy S26 Ultra chidamlilik boʻyicha oʻzaro solishtirildi

PhoneBuff YouTube-kanali mualliflari iPhone 18 Pro Max va Galaxy S26 Ultra smartfonlarini chidamlilik boʻyicha sinovdan oʻtkazishdi.

Birinchi sinov smartfonlarni bir metr balandlikdan tushirib yuborish boʻldi. Ikkala qurilmaning ham orqa panelidagi shishasi yorildi, biroq Apple flagmani yaxshiroq saqlanib qoldi. Samsung telefoni tashqi koʻrinishdan sezilarli darajada koʻproq shikastlandi.

Ikkinchi raundda qurilmalar burchagi bilan tushirib yuborildi. Ikkala smartfonning ham alyuminiy ramkalari tirnaldi, ammo iPhone 18 Pro Max’ning shikastlanishi jiddiyroq boʻldi — xususan, sezilarli darajada pachoqlangan joylar paydo boʻldi. Ushbu bosqichda Galaxy S26 Ultra oʻzini yaxshiroq koʻrsatdi.

Uchinchi sinov — ekran bilan pastga tushish — hal qiluvchi boʻldi. iPhone displeyi butun qoldi, Galaxy’niki esa chil-chil boʻldi. Bundan tashqari, unda barmoq izi skaneri ishlamay qoldi.

Keyingi raundlarda balandlik 1,5 metrgacha oshirildi, ammo vaziyat deyarli oʻzgarmadi. Qizigʻi shundaki, iPhone 18 Pro Max ekrani faqat oltinchi va oxirgi yiqilishdan keyingina yorildi.

Sinov yakunlariga koʻra, iPhone 18 Pro Max 56 ball toʻplab, 53 ball olgan Galaxy S26 Ultra’ni ortda qoldirgan holda yetakchiga aylandi.

Ushbu drop-testni qatʼiy ilmiy deb boʻlmaydi, biroq u smartfonlar tasodifan yiqilib tushganda nima sodir boʻlishi mumkinligi haqida umumiy tasavvur beradi. Taʼkidlash joizki, ikkala qurilma ham gʻilofsiz sinovdan oʻtkazildi, shuning uchun real hayotda himoya gʻilofi bilan ular, shubhasiz, yanada chidamliroq boʻladi.