Imarat Development asoschisi Marat Xamdamov firibgarlik ishi bo‘yicha ushlandi

Imarat Development asoschisi Marat Xamdamov firibgarlik ishi bo‘yicha qo‘lga olindi

Imarat Development brendi ostidagi qurilish loyihalariga aloqador tadbirkor Marat Xamdamov Toshkent shahri Ichki ishlar bosh boshqarmasi tomonidan tergov qilinayotgan jinoyat ishi doirasida ushlangan.

Idora ma’lumotiga ko‘ra, tergov jarayonida ikki shaxs — M.X. va J.A. Jinoyat-protsessual kodeksining 227-moddasi asosida ushlangan. Marat Xamdamov esa jinoyat ishida gumonlanuvchi sifatida jalb etilgan.

JPKning 227-moddasi surishtiruvchi, tergovchi yoki prokuror qaroriga binoan ushlab turishni nazarda tutadi. Ushlangan shaxs darhol eng yaqin ichki ishlar organi yoki boshqa huquqni muhofaza qiluvchi idoraga olib borilishi kerak.

Xabarda bosh harflari J.A. deb ko‘rsatilgan ikkinchi shaxsning kimligi oshkor etilmagan. Shuningdek, hozircha ushlanganlarga ayblov qo‘yilgani yoki keyinchalik qanday ehtiyot chorasi tanlanishi ham aniqlashtirilmagan.

1-noyabr kuni Toshkent shahri IIBB Tergov boshqarmasi tomonidan Jinoyat kodeksining 168-moddasi (Firibgarlik) va 192−11-moddasi (Nodavlat tijorat tashkilotida yoki boshqa nodavlat tashkilotida mansabdor shaxslar tomonidan vakolatlarni suiiste’mol qilish) bilan jinoyat ishi qo‘zg‘atilgandi.

Bunga quruvchi faoliyatidan norozi bo‘lib, uning rahbariyatiga nisbatan qonuniy chora ko‘rishni so‘ragan xonadon xaridorlarining murojaatlari asos bo‘lgan.

IIBB ma’lumotiga ko‘ra, Imarat Development MCHJ ofisi Toshkentning Sergeli tumani Buyuk avlod ko‘chasida joylashgan. Ammo kompaniya qurishni rejalashtirgan ko‘p qavatli uylar Toshkent viloyatining Quyi Chirchiq tumanida qad rostlamoqda.

Ba’zi xaridorlar uyni aynan Toshkent shahridan sotib olishni ko‘zlaganini aytib, obyektlar poytaxt hududidan tashqarida ekanidan norozi bo‘lgan. Ular shartnomalarni bekor qilishni va to‘langan pullarini qaytarishni talab qilgan, biroq huquqni muhofaza qiluvchi organlar xabariga ko‘ra, mablag‘lar ularga qaytarilmagan.

Jabrlanuvchilar soni va dastlabki zarar miqdori hozircha ochiqlanmagan.

Imarat Development brendi ostidagi qurilish loyihalari atrofidagi muammolar jinoyat ishi qo‘zg‘atilishidan ancha oldin jamoatchilik muhokamasiga sabab bo‘lgandi.

2025-yilning dekabrida Daryo nashri shartnomani bekor qilgandan keyin na xonadonni ololgan va na pullarini qaytara olgan xaridorlar haqida surishtiruv e’lon qilgandi.

Mijozlardan biri 2024-yil yanvarida Sergeli City loyihasidagi xonadon uchun 100 million so‘m to‘laganini aytgan. Uning so‘zlariga ko‘ra, menejer turar joy Toshkentning Sergeli tumanidan taxminan besh kilometr uzoqlikda joylashishini bildirgan. Biroq qurilish maydoniga borib ko‘rgan xaridor obyekt ancha uzoqda — Toshkent viloyati hududida joylashganini bilib qolgan.

Boshqa xaridorlar ham qurilish ishlari kechikayotgani va to‘lovlar uzoq vaqt davomida qaytarilmayotganidan shikoyat qilgan.

2025-yilning iyulida Qurilish va uy-joy kommunal xo‘jaligi sohasida nazorat qilish inspeksiyasi Quyi Chirchiq tumanidagi Sergeli City majmuasining beshta bloki qurilishida qoidabuzarliklarni aniqlagan. Ular orasida qurilish-montaj ishlarini boshlash uchun tegishli ro‘yxatdan o‘tmaslik, beton ustunlardagi bo‘shliqlar, poydevor ostida suv to‘planib qolishi hamda loyihada ko‘zda tutilgan drenaj tizimining yo‘qligi kabi holatlar qayd etilgan. Ushbu bloklar qurilishi vaqtincha to‘xtatilgan edi.

2026-yil oktabr oyi oxirida Kun.uz xaridorlarning shartnomada ko‘rsatilgan muddatlarda uylarni topshirish shartlari buzilayotgani haqidagi murojaatlarini yana e’lon qildi.

Shu shikoyatlar fonida Marat Xamdamov kompaniyaning boshqa ta’sischilari bilan o‘rtasidagi nizo haqida videomurojaatlar chiqardi. Uning ta’kidlashicha, sheriklari uni Sergeli City va Bristol City loyihalaridan chetlatib, ofis va qurilish maydonchalariga kirishiga to‘sqinlik qilgan. Shuningdek, u o‘ziga va oila a’zolariga tahdidlar bo‘layotganini ham ma’lum qilgan.