Hindiston va Pokiston harbiy kemalari to‘qnashib ketdi

**Hindiston va Pokiston harbiy kemalari dengizda to‘qnashdi**

Hindiston va Pokiston harbiy kemalari dengizda bir-biriga urildi. Hodisadan so‘ng Nyu-Dehli Pokistonning mamlakatdagi bosh diplomatini chaqirtirdi.

Diplomatning chaqirtirilishi Pokiston harbiy-dengiz kuchlarining nomaqbul va noprofessional xatti-harakatlari bilan izohlandi. Shu orqali Pokiston hukumatiga rasmiy norozilik bildirildi.

Bu yadroviy qurolga ega ikki qo‘shni o‘rtasida 2025-yildagi to‘rt kunlik harbiy to‘qnashuvdan beri yuz bergan ilk ochiq harbiy keskinlikdir. Kemalar to‘qnashuvi xalqaro suvlarda sodir bo‘lgan.

Hindiston manbalariga ko‘ra, 15-sentyabr kuni Arabiston dengizining shimoliy qismida Pokiston harbiy kemasi muntazam kuzatuv missiyasini bajarayotgan Hindiston kemasiga yuqori tezlikda yaqinlashgan va natijada to‘qnashuv yuz bergan.

“Zarba hech qanday jiddiy talofot yetkazmadi. Ammo Pokistonning xatti-harakati ikki davlat o‘rtasidagi harbiy mashqlar, manyovrlar va qo‘shinlar harakatini tartibga soluvchi 1991-yildagi kelishuvga to‘g‘ridan to‘g‘ri ziddir”, deya bayonot berdi Hindiston Tashqi ishlar vazirligi.

Kelishuvga binoan, har ikki davlatning harbiy va suvosti kemalari xalqaro suvlarda noxush hodisalarning oldini olish uchun bir-biridan kamida uch dengiz mili (5,5 kilometr) masofani saqlashi kerak. Pokiston hukumati va harbiylari bu holat yuzasidan darhol izoh bermadi.

Hindiston esa chaqirtirilgan diplomat orqali Pokiston tomoniga bunday hodisalar qayta takrorlanmasligi uchun ikki tomonlama kelishuvlarga amal qilish zarurligini urg‘uladi. Shuningdek, Hindistonning Islomoboddagi diplomatiga ham Pokiston Tashqi ishlar vazirligiga xuddi shunday e’tiroz bildirish topshirildi.

Hindiston va Pokiston bir-birining poytaxtlarida elchilarga ega emas. 2019-yildagi Kashmir mojarosi sabab diplomatik munosabatlar darajasi pasaytirilgan. O‘shandan beri diplomatik missiyalarni muvaqqat ishlar vakillari boshqarib kelmoqda.

**Ikki davlat o‘rtasidagi so‘nggi to‘qnashuv**

2025-yil aprel oyida Hindistonning Jammu va Kashmir mintaqasidagi Pahalgam shahri yaqinida sodir etilgan teraktdan keyin davlatlar o‘rtasidagi munosabatlar yomonlashgandi. O‘shanda “Qarshilik fronti” jangarilari sayyohlarga hujum qilib, 26 kishining o‘limiga sabab bo‘lgan. Hindiston hujumda Pokistonni ayblagan, rasman Islomobod esa hujumda ishtirok etmaganini aytib, ayblovni rad etgan. Keskinlik davomida Hindiston Pokiston bilan 1960-yildagi muhim suv shartnomasini to‘xtatgan va yagona quruqlikdagi chegara o‘tish punktini yopgan.

6-may kuni Hindiston “Sindur” operatsiyasini boshlab, Panjob va Pokistonning Kashmir qismiga raketa zarbalari bergan. Pokiston bunga javoban o‘t ochgan va 10-may kuni Hindiston bazalari, aerodromlari hamda raketa omboriga hujum qilgan. Tegishli operatsiya “Banyan-ul-Marsus” deb nomlangan. Mojaroning eng keskin nuqtasi, turli manbalarga ko‘ra, 125 tagacha qiruvchi samolyot ishtirok etgan havo jangi bo‘lgan.

10-may kuni tomonlar AQSH vositachiligida o‘t ochishni to‘xtatishga kelishdi. 88 soat davom etgan mojaro yakunida Hindiston 100 dan ortiq jangchi yo‘q qilingani, 5 nafar harbiy va 16 nafar tinch aholi halok bo‘lganini bildirdi. Pokiston esa 13 nafar harbiy hamda 40 nafar tinch aholi, jumladan, ayollar va bolalar halok bo‘lgani, 78 nafar harbiy yaralanganini ma’lum qildi.