Havaskordan "oltin fond"gacha. Oʻzbekistonda gidlar uchun toifalar joriy etiladi

50 daqiqa oldin

Yangi boshlanuvchidan «oltin fond»gacha. Oʻzbekistonda gidlar uchun toifalar joriy etiladi

1 dekabrdan boshlab Oʻzbekistonda gidlar va gid-tarjimonlar ixtiyoriy ravishda malaka toifalarini olishlari mumkin boʻladi. Ular kasbiy imtihon natijalariga koʻra, bilim, amaliy koʻnikmalar va turistlar bilan ishlash qobiliyatini hisobga olgan holda beriladi.

Tartib Vazirlar Mahkamasining qarori bilan belgilangan. Toifalarni Turizm qoʻmitasi huzuridagi Turizmni rivojlantirish ilmiy-tadqiqot instituti beradi.

Toifa ixtiyoriy xususiyatga ega. Uning yoʻqligi, agar gidda belgilangan tartibda olingan amaldagi malaka sertifikati boʻlsa, uning ishlash huquqidan mahrum qilmaydi. Sertifikat muddatsiz amal qiladi.

Mutaxassisning darajasi kasbiy imtihon natijalariga koʻra belgilanadi. Baholashda kasbiy bilim va amaliy koʻnikmalar, ekskursiyani tashkil etish va oʻtkazish qobiliyati, turistik obʼyektlarni bilish, turistlar bilan muloqot madaniyati, chet tillarini bilish va kasb etikasiga rioya qilish hisobga olinadi.

Tizim toʻrtta toifani oʻz ichiga oladi: «havaskor gid», «ixtisoslashgan gid», «professional gid» va «oltin fond gidi». Oʻtish ballari uchta daraja uchun belgilangan: havaskor — 56 dan 70 % gacha, ixtisoslashgan — 70 dan 85 % gacha va professional gid — 86 dan 100 % gacha. Eng yuqori «oltin fond gidi» toifasi uchun alohida chegara koʻrsatilmagan.

Kasbiy faoliyatida uzoq vaqt tanaffus qilganlar uchun alohida qoida nazarda tutilgan. Agar gid ikki yildan ortiq ishlamagan boʻlsa, u qayta imtihon topshirishi kerak boʻladi.

Shu hujjat bilan mamlakatning asosiy turistik obʼyektlari roʻyxati tasdiqlandi, ular boʻylab ekskursiyalar yagona tasdiqlangan matn asosida oʻtkaziladi.

Avvalroq Oʻzbekiston turizmni rivojlantirish surʼatlari boʻyicha mintaqada birinchi oʻrinni egallagan edi. Bunday maʼlumotlar Butunjahon sayohat va turizm kengashi (WTTC) hisobotida keltirilgan boʻlib, unda umuman Markaziy Osiyo dunyodagi eng tez rivojlanayotgan turistik yoʻnalish deb tan olingan.