Harri Keyn «Oltin to‘p» sohibi bo‘ldi
Keyn 25 yil ichida «Oltin to‘p»ni qo‘lga kiritgan ilk angliyalik futbolchi bo‘ldi. Ikkinchi o‘rinni Kilian
Harri Keyn «Oltin to‘p» sohibiga aylandi
Myunxenning «Bavariya» klubi va Angliya terma jamoasi hujumchisi Harri Keyn France Football jurnali, UYeFA va L’Équipe hamkorligida mavsumning eng yaxshi futbolchisiga beriladigan «Oltin to‘p» — 2026 mukofotini qo‘lga kiritdi.
An’anaviy ravishda Fransiyada o‘tkazib kelinadigan taqdirlash marosimi bu safar ilk bor Londonning «Palladium» teatrida bo‘lib o‘tdi. Sovrinni ikki karra jahon chempioni va «Oltin to‘p»ning ikki karra sohibi bo‘lgan braziliyalik Ronaldo topshirdi. Keyn bu mukofotni faoliyatida birinchi marta oldi.
2025/2026 yilgi mavsumda Keyn «Bavariya» bilan Germaniya Superkubogi, Germaniya kubogi va Bundesliga chempionligini qo‘lga kiritdi. Angliya terma jamoasi tarkibida esa 2026 yilgi jahon chempionatining bronza medaliga ega bo‘ldi. U 2025 yil avgustidan 2026 yil iyuligacha bo‘lgan davrda «Bavariya» va Angliya terma jamoasi safida 65 ta o‘yinda 73 ta gol urdi.
Ovoz berish yakunlariga ko‘ra, ikkinchi o‘rinni Madridning «Real» klubi va Fransiya terma jamoasi hujumchisi Kilian Mbappe egalladi. Kuchli uchlikni esa «Barselona» va Ispaniya terma jamoasi hujumchisi Lamin Yamal yakunladi.
Keyn 25 yil ichida «Oltin to‘p»ni qo‘lga kiritgan ilk angliyalik futbolchi bo‘ldi. 2001 yilda bu mukofot Maykl Ouenga nasib etgan edi. Keyn tarixda «Oltin to‘p»ga sazovor bo‘lgan beshinchi angliyalik futbolchi hisoblanadi.
Shuningdek, u so‘nggi 30 yil ichida Germaniya Bundesligasida to‘p suradigan klub futbolchilari orasida «Oltin to‘p»ni qo‘lga kiritgan ilk futbolchi bo‘ldi.
«Oltin to‘p» har yili France Football fransuz jurnali tomonidan topshiriladi. O‘tgan yili ushbu mukofotga PSJ va Fransiya terma jamoasi hujumchisi Usmon Dembele sazovor bo‘lgan edi.