Harbiy burchdan — oʻqituvchilik kasbiga: Toshkentda faxriy pedagoglar taqdirlandi | Reportaj

Harbiy burchdan — oʻqituvchilik kasbigacha: Toshkentda faxriy pedagoglar taqdirlandi | Reportaj

Toshkentda Oʻqituvchi va murabbiylar kuni bayrami doirasida Afgʻonistondagi harbiy harakatlarning sobiq qatnashchilari boʻlgan faxriy pedagoglar, shuningdek, Oʻzbekiston «VETERAN» jangchi-faxriylar va nogironlar birlashmasining eng faol koʻngillilarini taqdirlash marosimi boʻlib oʻtdi.

Xotira tadbiri «Gʻalaba bogʻi» yodgorlik majmuasida oʻtkazildi. Bu yerga baynalmilalchi jangchilar, umumtaʼlim maktablari oʻquvchilari, oʻqituvchilar va keng jamoatchilik vakillari jang maydonida oʻz burchini sharaf bilan ado etib, keyinchalik hayotini munosib avlodni tarbiyalashga bagʻishlagan insonlarga minnatdorchilik bildirish uchun yigʻildilar.

Tantanali qism anʼanaga koʻra «Matonat madhiyasi» monumenti poyiga gullar qoʻyish bilan boshlandi. Uchrashuv ishtirokchilari uyiga qaytmagan Vatan himoyachilari xotirasini yod etdilar.

1979–1989 yillardagi Afgʻoniston voqealari davrida 65 000 dan ortiq oʻzbekistonlik oʻz harbiy burchini bajargan. 1 500 dan ortiq hamyurtimiz Afgʻon tuprogʻida qahramonlarcha halok boʻlgan, 5 000 dan ortigʻi ogʻir yaralangan va shikastlangan.

Tinch hayotga qaytgach, koʻplab faxriylar oʻzlari uchun kam boʻlmagan masʼuliyatli xizmatni tanladilar: oliy pedagogik maʼlumot olib, maktablarda ishlay boshladilar. Bilim, xarakter matonati, Vatanga boʻlgan samimiy muhabbat va burchga sodiqlik ular oʻnlab yillar davomida Oʻzbekistonning oʻsib kelayotgan avlodini tarbiyalayotgan mustahkam poydevorga aylandi.

Xotira aktsiyasidan soʻng yodgorlik majmuasining katta konferentsiya zalida yigʻilganlar oldida Oʻzbekiston «VETERAN» jangchi-faxriylar va nogironlar birlashmasi raisi Talʼat Murodov soʻzga chiqdi. U oʻz nutqida pedagogika va murabbiylik yoʻlini tanlagan faxriylarning beqiyos hissasini taʼkidlab oʻtdi.

Tashkilot rahbari Birlashmaning koʻngillilar korpusi faoliyatiga alohida eʼtibor qaratdi. Koʻngillilar doimiy va fidokorona faoliyat olib bormoqdalar: faxriylar, nogironligi boʻlgan shaxslar, halok boʻlgan jangchilarning oilalari, shuningdek, ogʻir bemor bolalar va yolgʻiz keksa fuqarolarga manzilli maʼnaviy va moddiy yordam koʻrsatmoqdalar.

Uchrashuvning eng hayajonli lahzasi faxriy pedagoglar va faol koʻngillilarga Birlashma raisi nomidan esdalik sovgʻalari va faxriy yorliqlarni topshirish marosimi boʻldi.

«Faxriylarimizga boʻlgan hurmat va minnatdorchiligimiz faqat bayram kunlari bilan cheklanib qolmasligi kerak. Haqiqiy hurmat aniq, kundalik ezgu ishlarda va qoʻllab-quvvatlashga muhtoj boʻlganlarga gʻamxoʻrlik qilishda namoyon boʻladi», — degan fikrlar yangradi tantanali uchrashuv davomida.

Bayramona kayfiyatni rang-barang madaniy dastur yanada boyitdi. Mehmonlar uchun «Vatanparvar fidoiylari» ijodiy guruhi sozandalari, shuningdek, Toshkent shahridagi 53-sonli umumtaʼlim maktabining ijodiy jamoalari chiqish qilishdi. Tinchlik, doʻstlik va Vatan haqida kuylangan qoʻshiqlar hamda ijro etilgan raqslar barcha yoshdagi tomoshabinlar qalbidan chuqur joy oldi.

Tarixga hurmat bilan munosabatda boʻlmasdan va ona zaminga samimiy muhabbatsiz kuchli va gullab-yashnagan davlatni barpo etib boʻlmaydi. Aynan shuning uchun ham oʻqituvchi va murabbiylarga boʻlgan hurmat va taʼzim har bir fuqaroning muqaddas burchidir.