Hamma narsaga javobgar

Hamma narsaga javobgar

Kaspiydagi mashgʻulotlar vaqtida harbiy xizmatchilar halok boʻlishi ishi boʻyicha Mudofaa vazirligi tizimining besh nafar mansabdor shaxsi qoʻlga olindi, deb xabar berdi Qozogʻiston IIV.

«Xizmatga sovuqqonlik bilan qarash va kema boshqarish qoidalarini buzish bilan bogʻliq, ogʻir oqibatlarga olib kelgan jinoiy huquqbuzarliklarni sodir etganlikda gumonlanib, Qozogʻiston Qurolli Kuchlari oliy va katta qoʻmondonlik tarkibining masʼul mansabdor shaxslari qoʻlga olindi. Ularning barchasi Aqtau politsiya boshqarmasining vaqtinchalik saqlash hibsxonasiga joylashtirildi», – deyiladi xabarda.

Ular orasida:

— shtab boshligʻi – QR Harbiy-dengiz kuchlari bosh qoʻmondonining birinchi oʻrinbosari;

— ikki nafar harbiy qism komandiri;

— dengiz piyodalari rotasi va kater komandirlari bor.

Tergov davomida oʻquv-jangovar vazifani tashkil etish va oʻtkazishda qarorlar qabul qilinishi holatlari, xavfsizlik talablariga rioya etilishi, gidrometeorologik vaziyatning hisobga olinishi, katerning texnik holati va mashgʻulotlarni oʻtkazishga masʼul boʻlgan mansabdor shaxslarning harakatlari tekshirilmoqda. Idoradan taʼkidlanishicha, sudgacha boʻlgan tergov jarayoni Ichki ishlar vazirligi va Bosh prokuraturaning alohida nazoratida turibdi.

Mazkur fakt boʻyicha ikkita jinoyat ishi qoʻzgʻatilgan: 453-modda, 2-qism («Ogʻir oqibatlarga olib kelgan xizmatga sovuqqonlik bilan qarash») va 465-modda («Kema boshqarish qoidalarini buzish») boʻyicha. Gumonlanuvchilar aniqlangan.

QR Bosh prokuraturasi xabar berishicha, tergov allaqachon voqea joyini koʻzdan kechirgan, 30 dan ortiq harbiy xizmatchini soʻroq qilgan, hujjatlar va videomateriallarni olib qoʻygan, 12 ta ekspertiza tayinlagan va gumonlanuvchilarni aniqlagan.

Soʻnggi maʼlumotlarga koʻra, mashgʻulotlar davomida 14 kishi halok boʻlgan, uch kishi qutqarilgan. Qutqaruvchilar, gʻavvoslar va aviatsiya Kaspiy dengizi akvatoriyasida bedarak yoʻqolgan harbiy xizmatchilarni tunu kun qidirdi. 25 sentyabr kuni ertalab bedarak yoʻqolgan oxirgi ikki harbiy xizmatchining jasadi topildi, shundan soʻng qidiruv operatsiyasi yakunlandi.

25 sentyabr Qozogʻistonda umummilliy motam kuni deb eʼlon qilindi.

2026 yil 24 sentyabrda Kaspiyda yuz bergan va 14 nafar harbiy xizmatchining hayotiga zomin boʻlgan fojia mashgʻulotlar va jangovar tayyorgarlik vaqtida shaxsiy tarkib xavfsizligi masalasini yana kun tartibiga chiqardi. Mustaqillik yillarida Qozogʻiston Qurolli Kuchlar tizimida yirik favqulodda vaziyatlar – aviahalokatlar, oʻq-dorilar omborlaridagi portlashlar, mashgʻulotlarda harbiylarning halok boʻlishiga bir necha bor duch kelgan.

2004 yil 14 sentyabr – Yak-18 halokati, Aqtoʻbe viloyati – 2 halok boʻlgan

Martuk tumanidagi Xlebodarovka harbiy-oʻquv poligonida oʻquv-mashq parvozi vaqtida Yak-18 samolyoti boshqarib boʻlmaydigan shpiralga (shtopor) kirib, qulab tushgan. T. Ya. Begeldinov nomidagi Havo mudofaasi kuchlari harbiy institutining uchuvchi-yoʻriqchisi va kursanti halok boʻlgan.

2007 yil 16 fevral – Qaragʻanda yaqinida MiG-31 halokati – 2 halok boʻlgan

Oʻquv parvozi vaqtida Sari-Arqa aeroportidan taxminan besh kilometr uzoqlikda Havo mudofaasi kuchlarining MiG-31 qiruvchi-tutib oluvchi samolyoti qulab tushgan. Ekipajning ikkala aʼzosi – kapitan Denis Fedotov va mayor Andrey Leontyev halok boʻlgan.

2008 yil 12 fevral – MiG-29UB halokati, Jetigen – 1 halok boʻlgan

Almati viloyatidagi Jetigen aerodromida oʻquv-jangovar MiG-29UB qulab tushgan. Ikkala uchuvchi ham katapulta qilgan, biroq mayor Aleksandr Kovyazin halok boʻlgan, podpolkovnik Vitaliy Dilmuhamedov jarohat olgan. Keyinchalik komissiya halokatni samolyotning elektr taʼminoti tizimidagi nosozlik bilan bogʻlagan.

2009 yil 20 mart – Arisda oʻq-dorilarni utilizatsiya qilish paytidagi portlashlar – 4 halok boʻlgan

Oʻq-dorilarni utilizatsiya qilish bilan shugʻullanuvchi «KazArsenal» hududida yongʻin boshlanib, keyin detonatsiya va bir nechta portlashlar sodir boʻlgan. Natijada toʻrt kishi halok boʻlgan, yana 17 kishi jarohatlangan. Keyinchalik tergov xavfsizlik talablarining qoʻpol ravishda buzilganini aniqlagan. Ushbu FV harbiy oʻq-dorilarni utilizatsiya qilish tizimiga tegishli, biroq halok boʻlganlar korxona ishchilari boʻlgan, shu boqisdan ularning toʻrtalasini ham harbiy xizmatchi deb hisoblab boʻlmaydi.

2012 yil 22 avgust – Ostona yaqinida Mi-17 halokati – 4 nafar harbiy xizmatchi halok boʻlgan

Ostona aerodromi hududida oʻquv-mashq parvozi vaqtida Mudofaa vazirligining Mi-17 vertolyoti qulab tushgan. Toʻrt kishidan iborat butun ekipaj halok boʻlgan.

2013 yil 27 avgust – Otarda oʻq-dorilarni utilizatsiya qilish paytidagi portlash – 4 halok boʻlgan

Jambil viloyatining Otar stantsiyasi yaqinidagi «Kazaxvzrivprom» AJ oʻq-dorilarni utilizatsiya qilish punktida porox zaryadlari yonib ketgan va keyinchalik portlash sodir boʻlgan. Yetti kishi ogʻir termik kuyish jarohatini olgan, toʻrt kishi keyinchalik vafot etgan. Oʻsha davrdagi manbalarda «Kazaxvzrivprom» Mudofaa vazirligining shoʻʼba tuzilmasi sifatida koʻrsatilgan; halok boʻlganlar harbiy xizmatchilar emas, balki korxona ishchilari boʻlgan. Keyinchalik ushbu ish boʻyicha korxona xodimlari sudlangan.

2014 yil 23 sentyabr – Taldiqoʻrgʻan yaqinida Su-27 halokati – 2 nafar harbiy xizmatchi halok boʻlgan

Oʻquv-mashq parvozi vaqtida Su-27 bilan aloqa yoʻqolgan. Samolyot Almati viloyatining Koʻksu tumanida qulab tushgan. Podpolkovnik Yerlan Nauanov va podpolkovnik Denis Gorbunov halok boʻlgan.

2015 yil 18 sentyabr – Aqtauda «Markaz-2015» mashgʻulotlari vaqtida Kaspiydagi fojia – 4 nafar harbiy xizmatchi halok boʻlgan

Dengiz desantini tushirish epizodini mashq qilish vaqtida Kaspiyga 52 nafar harbiy xizmatchi boʻlgan oltita BTR-80 chiqqan. Kuchli toʻlqin tufayli toʻrtta bronetransportyor choʻkib ketgan. Toʻrt nafar muddatli harbiy xizmatchi halok boʻlgan.

2017 yil 17 fevral – Jambil viloyati, Koʻqsoy darasida qor koʻchkisi – 7 nafar harbiy xizmatchi halok boʻlgan

Juali tumanidagi 91678 harbiy qism harbiy xizmatchilarining rejali jangovar tayyorgarlik mashgʻulotlari vaqtida qor koʻchkisi yuz bergan. Uning ostida togʻ-oʻqchi polkining 23 nafar harbiy xizmatchisi qolgan. Yetti kishi halok boʻlgan, qolganlari qutqarilgan. Bu hozirgi fojiagacha bevosita jangovar tayyorgarlik vaqtida yuz bergan eng yirik favqulodda vaziyatlardan biridir.

2019 yil 27 mart – Qiziloʻrda viloyatida Mi-8 halokati – 13 nafar harbiy xizmatchi halok boʻlgan

Mudofaa vazirligining Mi-8 harbiy vertolyoti vertolyotlar guruhi tarkibida parvoz qilayotganda halokatga uchragan. Bortda 13 kishi boʻlgan – barchasi halok boʻlgan. Halok boʻlganlar soni boʻyicha bu mustaqil Qozogʻiston Qurolli Kuchlaridagi eng yirik halokatlardan biridir.

2019 yil 24 iyun – Arisdagi arsenalda portlashlar – 4 halok boʻlgan, yuzlab jarohatlanganlar

44856 harbiy qismning oʻq-dori omborlarida yongʻin boshlanib, oʻq-dorilarning ommaviy detonatsiyasi sodir boʻlgan. Deyarli butun shahar aholisini evakuatsiya qilishga toʻgʻri kelgan.

2021 yil 26 avgust – Jambil viloyati Boyzaq tumanidagi oʻq-dori omborida yongʻin va portlashlar – 17 halok boʻlgan, ulardan 6 nafari Mudofaa vazirligi harbiy xizmatchilari

28349 harbiy qismda muhandislik oʻq-dorilari omborida yongʻin chiqqan, shundan soʻng bir qator kuchli portlashlar sodir boʻlgan. Halok boʻlganlarning umumiy soni boʻyicha bu mustaqillik yillarida Mudofaa vazirligi obʼyektida yuz bergan eng yirik favqulodda vaziyatlardan biridir.