Ham yuk tashiydi, ham dronlarga oʻq uzadi: AQShda haydovchisiz mashina taqdim etildi
AQShning Forterra va Hypercraft kompaniyalari xavfli hududlarga harbiy yuklarni haydovchisiz yetkazishga moʻljallangan mashinani taqdim etdi. Razorback platformasi 1800 kilogrammgacha yuk tashiydi va kichik dronlarga qarshi qurolli turel bilan jihozlangan.
Ham yuk tashiydi, ham dronlarga qarshi oʻq uzadi: AQShda haydovchisiz avtomobil namoyish etildi
Loyiha Hypercraft kompaniyasining yoʻltanlamas Razorback mashinasi, Forterra ishlab chiqqan AutoDrive avtonom boshqaruv tizimi va 9 Mothers kompaniyasining Edda turelini birlashtiradi.
Mashina taʼminot yoʻllari oʻqqa tutilayotgan vaziyatlarda yuk yetkazib berish uchun moʻljallangan. Bunday vazifalarni haydovchisiz bajarish odamlarning bevosita xavf ostida qolishini kamaytirishga qaratilgan.
Razorback — Yuta shtatining Provo shahridagi Hypercraft kompaniyasi yaratgan birinchi toʻliq mashina. Kompaniya avval tijorat transporti uchun elektr kuch qurilmalarini ishlab chiqish bilan shugʻullangan, keyinchalik esa mudofaa yoʻnalishidagi ishlanmalarni ham boshlagan.
Mashinaning uzunligi toʻrt metrdan oshadi, yuk koʻtarish quvvati esa 1,8 tonnaga teng. Hypercraft maʼlumotiga koʻra, uning yurish zaxirasi qariyb 800 kilometrni tashkil etadi. Bundan tashqari, mashina tashqi uskunalarni 38 kilovattgacha elektr quvvati bilan taʼminlay oladi.
Konstruksiya vazifaga qarab qoʻshimcha datchiklar, radiostansiyalar, qurollar va boshqa jihozlarni oʻrnatish imkonini beradi. Razorback boshidan avtonom ishlashga moʻljallangani AutoDrive boshqaruv tizimini oʻrnatishni yengillashtirgan.
Mashinaga oʻrnatilgan Edda turelining ogʻirligi taxminan 23 kilogramm. U kichik dronlarni parraklari ovozidan aniqlaydi, kameralar orqali kuzatadi va sochma oʻqli miltiqdan oʻq uzadi. Tizim 10 metrdan 100 metrgacha masofadagi dronlarni nishonga olish uchun moʻljallangan.
Shu tariqa, yangi platforma harbiy taʼminotni avtonom yetkazib berish va dronlarga qarshi kurashish imkoniyatlarini bitta mashinada jamladi.