Haftaning birinchi yarmida qator hududlarda yomg‘ir yog‘adi
“O‘zgidromet” prognoziga ko‘ra, yog‘ingarchilik 4-noyabrdan boshlanadi. Baland togʻlarda qor yog‘ishi kutilmoqda.
Haftaning boshida bir qator hududlarda yomg‘ir yog‘adi
O‘zbekistonda 4-noyabrdan boshlab ayrim hududlarda yomg‘ir yog‘ishi kutilmoqda.
“O‘zgidromet” prognozlariga ko‘ra, 2—3-noyabr kunlari Oʻzbekiston hududining katta qismida quruq va iliq ob-havo saqlanib turadi. Kunduzi havo harorati asosan 20-23 daraja iliq bo‘ladi.
4-noyabr kuni Buxoro, Navoiy va Surxondaryo viloyatlarining ayrim joylarida, kechga tomon esa respublikaning qolgan hududlarida yomgʻir yogʻadi. Shimoliy va sharqiy hududlarda esa yogʻingarchiliksiz ob-havo kuzatilishi kutilmoqda.
5-noyabrda respublikaning markaziy va sharqiy hududlarida faqat kechasi va ertalab ayrim joylarda yomgʻir yogʻishi davom etadi.
6-noyabrda yogʻingarchilik kutilmaydi, faqat Qoraqalpogʻiston Respublikasining shimoliy hududlarida yomgʻir yogʻishi mumkin.
Ushbu kunlarda havo harorati kechalari 7-12 daraja iliq atrofida, kunduz kunlari esa 4-5-noyabrda 18-23 daraja iliq, 6-noyabrda 23-25 daraja iliq, janubiy hududlarda esa 27 daraja iliqqacha bo‘ladi.
Oʻzbekistonning togʻli hududlarida ayrim joylarda yomgʻir yogʻadi, baland togʻlarda esa qorga aylanishi mumkin.
Toshkentda faqat 4-noyabr kuni kechqurun va 5-noyabrda kechasi hamda ertalab biroz yomgʻir yogʻishi mumkin. Havo harorati kechalari 8-10 daraja iliq, kunduz kunlari 20-22 daraja iliq atrofida bo‘ladi.
Noyabr oyi bo‘yicha prognozlarga ko‘ra, ushbu oyda o‘rtacha oylik havo harorati me’yor atrofida, ayrim joylarda esa me’yordan 1-1,5 darajaga yuqori bo‘lishi kutilmoqda. Oyning ikkinchi va uchinchi o‘n kunliklarida harorat fonida pasayish kuzatiladi.