«Goʻzal, joʻshqin» Disney yulduzi Karla Jefferi 33 yoshida vafot etdi
Jefferi 2018 yilda Disney kanalining «Zombilar» filmida va uning ikkita davomida cherlider Bri rolini oʻynagani bilan tanilgan edi.
«Goʻzal, joʻshqin» Disney yulduzi Karla Jefferi 33 yoshida vafot etdi
«Zombilar» filmidagi hamkasblaridan biri Jefferi «oʻzining yuqumli pozitivi bilan har bir kunni yaxshiroq va yorqinroq qilganini» aytdi
2018 yilda Disney Channel kanalining «Zombilar» (Zombies) filmi va uning ikkita davomida suratga tushishi bilan tanilgan amerikalik aktrisa Karla Jefferi 33 yoshida vafot etdi.
Uning agenti Karla Aleksandr bu xabarni eʼlon qilib, uni «nurli tabassumi har qanday xonani yoritib yubora oladigan goʻzal, joʻshqin va beqiyos isteʼdodli ayol» deb atadi.
Jefferi «Zombilar» filmida va uning 2020 hamda 2022 yillardagi davomlarida cherlider Bri rolini ijro etgan, bundan oldin esa «Oʻz gʻayratingni jilovla» (Curb Your Enthusiasm) serialida «Katrina» toʻfonidan keyin Larri Devidnikiga koʻchib oʻtgan Bleklar oilasi aʼzolaridan biri sifatida epizodik rolda koʻrinish bergan edi.
Oʻlim sababi maʼlum qilinmagan.
«Sevimli Karla Jefferimizni yoʻqotganimizdan qaygʻuda ekanmiz, qalbimiz vayron boʻldi.
20 yildan ortiq vaqt davomida Karla Alexanders Talent Management oilasining bir qismi edi va uning isteʼdodli yosh qizchadan biz bilgan goʻzal, joʻshqin ayol va aktrisagacha boʻlgan oʻsish yoʻlini kuzatish biz uchun katta sharaf boʻldi.
Biz uning yuqumli tabassumini, kulgisini, isteʼdodini va oʻzi bilan birga olib yurgan goʻzal nurini doimo yodda saqlaymiz.
Karlaning oilasi va yaqinlariga chuqur hamdardlik bildiramiz. Ushbu oʻta ogʻir damlarda ularning shaxsiy hayoti hurmat qilinishini soʻraymiz. Oxirating obod boʻlsin, Karla. Seni juda sogʻinamiz va seni abadiy sevamiz».
Jefferining egizak akasi, u ham aktyor boʻlgan Karlon ushbu bayonotni singlisining sohildagi videosi va sanasi koʻrsatilmagan matnli xabar skrinshoti bilan birga qayta joylashtirdi.
«Salom singiljon, buni koʻrganingda menga telefon qil. Kuning qanday oʻtganini bilish uchun qoʻngʻiroq qilayotgandim! Seni juda-juda yaxshi koʻraman, singiljon», deyiladi xabarda.
«Sen bilan qanchalik faxrlanishimni bilishingni xohlayman. Sening bardoshing, nafosating, xonani yoritib yuboradigan yuqumli tabassuming. Sen haqiqatan ham porlab turgan nursan. Hech kimga, hatto oʻzingga ham bu nurni soʻndirishga yoʻl qoʻyma.
Sen taratgan nur oʻziga xosdir va uni har doim asrash kerak. Sen aka orzu qilishi mumkin boʻlgan eng yaxshi singilsan. Ushbu hayot yoʻlida bir-birimizga yanada yaqinroq boʻlib borishimizni soʻrab duo qilaman. Bu hayotda ham, u dunyoda ham seni qoʻllab-quvvatlayman».
Uning hamkasblari ham taʼziya bildirishdi, jumladan, «Zombilar» filmida Villa rolini oʻynagan Chendler Kinni aktrisaning oʻlimi «haqiqatga oʻxshamayotganini» yozdi.
«Karla. Eng shirin, eng yorqin qiz. Sen oʻzingning yuqumli pozitiving bilan har bir kunni yaxshiroq va yorqinroq qilding», deb yozdi Kinni.
«Menimcha, Bri roliga bunchalik joʻshqinlik olib kira olganingning sababi (ulkan isteʼdodingdan tashqari) qalban aynan shunday boʻlganingdir; atrofidagilarni ruhlantirishdan boshqa narsani istamaydigan, quvnoq, joʻshqin va oltin qalbli cherlider eding».
Zed rolini oʻynagan Maylo Manxeym bir nechta fotosuratlarni ulashib, unga shunday izoh qoldirdi: «Seni yaxshi koʻraman, Karlabu, eng shirin, eng mehribon, eng sevimli inson».