Germaniya oltinçi avlod qiruvçisini yaratiş loyihasiga qöşilişi mumkin
Germaniya Yaponiya, Buyuk Britaniya va Italiya iştirokidagi GCAP qiruvçi samolyot dasturiga qöşiliş imkoniyatini örganmoqda. Kansler Fridrix Mers Tokioda bu masala böyiça tekşiruv ötkazişga topşiriq tayyorligini bildirdi. Yakuniy qaror hozirça qabul qilinmagan.
Germaniya oltinchi avlod qiruvchisini yaratish loyihasiga qo‘shilishi mumkin
Mers 28-oktabr kuni Yaponiya bosh vaziri Sanae Takaiti bilan uchrashuvdan so‘ng ikki mamlakat qiruvchi yaratish sohasida hamkorlik qilish imkoniyatlarini ko‘rib chiqayotganini ma’lum qildi.
Tashrif chog‘ida Berlin va Tokio iqtisodiy xavfsizlik, ilg‘or texnologiyalar hamda mudofaa sohalarida hamkorlikni kengaytirishga kelishib oldi.
Takaiti Germaniya bilan mudofaa sohasidagi hamkorlikni qo‘llab-quvvatlab, ikki davlatning xalqaro tinchlik va barqarorlikka hissa qo‘shishi muhimligini ta’kidladi.
Yangi qiruvchi 2035-yilga mo‘ljallangan
GCAP — Global Combat Air Programme doirasida Buyuk Britaniya, Yaponiya va Italiya oltinchi avlod jangovar samolyotini ishlab chiqmoqda. Reuters ma’lumotiga ko‘ra, uni 2035-yilga borib foydalanishga tayyorlash rejalashtirilgan.
Oktabr boshida Buyuk Britaniya bosh vaziri Endi Byornem Germaniyaga mazkur dasturda ishtirok etishni taklif qilgan edi. Bu Germaniya, Fransiya va Ispaniyaning FCAS loyihasi muvaffaqiyatsizlikka uchragani haqidagi xabarlardan keyin yuz bergan.
Reuters yozishicha, FCAS bo‘yicha asosiy kelishmovchiliklar Germaniya va Fransiya kompaniyalarining ishlab chiqarishdagi ulushlariga taalluqli bo‘lgan.
Ayni paytda Germaniya uchun boshqa variantlar ham muhokama qilinmoqda. Dpa agentligiga ko‘ra, ular orasida Airbus, Shvetsiya va Saab mudofaa konserni o‘rtasidagi hamkorlik ham bor.
Ishlab chiqarishdagi ishtirok shartlari o‘rganiladi
Mers GCAP dasturining sanoatga oid ayrim kelishuvlari ancha ilgarilab ketganini qayd etdi. Shu sababli Germaniyaning loyihaga qanday shartlarda qo‘shilishi mumkinligini alohida o‘rganish zarur.
Kanslerning ta’kidlashicha, Yevropa turli jangovar tizimlar sonini kamaytirib, ishlab chiqariladigan qurollar miqdorini oshirishi kerak. Uning fikricha, katta hajmdagi ishlab chiqarish kelajakda qiruvchilar narxiga hal qiluvchi ta’sir ko‘rsatadi. GCAP’da bir nechta yirik davlat ishtirok etayotgani hamkorlik foydasiga dalil bo‘lishi mumkin.
Yaponiya Germaniyadan yil oxirigacha javob olishni istamoqda. Biroq Mers Berlin bunday qisqa muddatda qarorga kela olishini hozircha tasdiqlay olmasligini aytdi.