FVV Chorvoq suv omborida choʻkib ketgan uch kishini qidirish ishlarini yakunladi. Otaning jasadi topildi. Video
FVV Chorvoq suv omborida choʻkib ketgan uch kishini qidirish boʻyicha qutqaruv operatsiyasini yakunladi. Otaning jasadi topildi. Video
Chorvoq suv omborida 2 sentyabr kuni choʻkib ketgan bir oilaning uch aʼzosini qidirish ishlari yakunlandi. Bugun Favqulodda vaziyatlar vazirligi gʻavvoslari ularning otasi jasadini topishdi. Avvalroq qutqaruvchilar ikkala oʻgʻilning ham jasadini topishgan edi.
Ushbu maʼlumotni FVV matbuot xizmati tasdiqladi.
Eslatib oʻtamiz, fojia 2 sentyabr kuni oilaning katerda sayr qilishi vaqtida yuz bergan. Erkaklardan biri taqiqlangan joyda choʻmilishga qaror qilib, suvga qutqaruv nimtasisiz tushgan. U choʻka boshlaganida, otasi va akasi unga yordam berishga shoshilishgan. Natijada ularning uchchalasi ham choʻkib ketgan.
Birinchi boʻlib, 9 sentyabr kuni gʻavvoslar kenja oʻgʻilning jasadini topishdi. Ertasi kuni, 10 sentyabrda uning akasining jasadi topildi. Soat 13:35 da FVV gʻavvoslari oxirgi halok boʻlgan shaxsning jasadini topishdi. Shu tariqa, qidiruv operatsiyasi yakunlandi.
Qidiruv ishlariga Jizzax va Sirdaryo viloyatlari Favqulodda vaziyatlar boshqarmalarining qoʻshimcha kuch va vositalari, shuningdek, zamonaviy qidiruv uskunalari jalb etildi. Suv omborining maydoni katta va chuqurligi sezilarli boʻlishiga qaramay, qutqaruvchilar halok boʻlgan uchchala kishining ham jasadini topishga muvaffaq boʻlishdi.
FVV fuqarolarni suv havzalarida xavfsizlik qoidalariga rioya qilishga va suv transporti vositalarida sayr qilishda qutqaruv nimtalaridan foydalanishga yana bir bor chaqirdi.