Frantsiya: norozilik namoyishlari sababli 400 dan ortiq litsey masofaviy taʼlimga oʻtkazildi
Frantsiyada litsey oʻquvchilarining norozilik namoyishlari davom etmoqda, bu 400 dan ortiq taʼlim muassasasini qamrab oldi. 1 oktyabr kuni bir qator shaharlarda norozilik aktsiyalari va litseylarni toʻsib qoʻyish holatlari yuz berdi; ayrim hollarda politsiya bilan toʻqnashuvlar sodir boʻldi, deb xabar beradi Le Monde.
Frantsiya: norozilik namoyishlari fonida 400 dan ortiq litsey masofaviy taʼlimga oʻtkazildi
Taʼlim vaziri Eduard Jeffre zoʻravonlikda «oʻta soʻl guruh»ni ayblab, harakatning «tabiati oʻzgarganini» maʼlum qildi.
Nashrning xabar berishicha, litseychilar va talabalar kasaba uyushmalari oʻqituvchilar sonini koʻpaytirishni hamda binolarni taʼmirlash boʻyicha favqulodda reja tayyorlashni talab qilishgan.
Juma kuni, 2 oktyabrda, 400 dan ortiq litsey yopilgan, ularda darslar masofaviy formatda oʻtilmoqda.
Mamlakat Ichki ishlar vazirligi maʼlumotlariga koʻra, payshanba kuni 1 949 kishi qoʻlga olingan; Adliya vazirligining xabar berishicha, dushanba kunidan beri 1 793 kishi hibsga olingan.
Taʼlim vaziri harakat boshlanganidan buyon 65 nafar xodim va 170 nafar oʻquvchi jabrlanganini maʼlum qildi.
Stipendiya olmaydigan talabalar uchun BTS va tayyorlov sinflarida oʻqish uchun toʻlov chorasi bekor qilindi (tegishlicha 178 va 270 yevro).
Juma kuni taʼlim vaziri litseychilar va oʻquvchilarning ota-onalari assotsiatsiyalarini qabul qiladi.
Kasaba uyushmalari oʻqituvchilarni ommaviy ravishda ishga qabul qilish va binolarni taʼmirlash boʻyicha favqulodda reja ishlab chiqilishini talab qilmoqda.
Milliy litseychilar ittifoqi prezidenti Ryad Rani va Milliy talabalar ittifoqi vakili Sabrin Xarbash juma kuni ularni taʼlim vaziri qabul qilishini maʼlum qilishdi. Kasaba uyushmalari vakillarining talablari qatorida — oʻqituvchilarni ommaviy ravishda ishga qabul qilish, binolarni taʼmirlash rejasini ishlab chiqish va ularning taʼkidlashicha, universitetlar hamda maktablarni yetarlicha moliyalashtirmaslik muammosini hal qilish bor.
Eduard Jeffre litseychilar harakati «boshida qonuniy boʻlganini», ammo hozirda «oʻta zoʻravon guruhlar tomonidan egallab olinganini» aytdi.
U shuningdek, «Boʻysunmas Frantsiya» (La France insoumise, LFI) partiyasini toʻsiqlarni «avj oldirish va oʻzlashtirib olish»da aybladi.