Frantsiya bosh vaziri 164 kishi hibsga olinganidan keyin maktablardagi norozilik namoyishlari kuchayishidan ogohlantirdi

Frantsiya Bosh vaziri 164 kishi hibsga olinganidan keyin maktablardagi norozilik namoyishlari kuchayishidan ogohlantirdi

Frantsiya Bosh vaziri Sebastyan Lekornyu dushanba kuni 164 kishi hibsga olinganidan keyin mamlakatda davom etayotgan talabalar norozilik namoyishlarining yanada kuchayishi «masʼuliyatsizlik» boʻlishidan ogohlantirdi.

Parijda boshlangan va oʻsmirlar bir necha kundan beri oʻz maktablarini toʻsib qoʻyishi bilan davom etayotgan namoyishlarga sinflarda oʻquvchilar soni haddan tashqari koʻpligi va oʻqituvchilar yetishmovchiligi kabi xavotirlar sabab boʻlmoqda.

X ijtimoiy tarmogʻidagi postida Lekornyu namoyishlarda qayd etilgan hodisalarga ishora qilib, shunday dedi: «Litseylar yaqinidagi pirotexnika vositalari, yongʻinlar, zoʻravonliklar: hech narsa oʻquvchilar, xodimlar yoki politsiya xodimlari hayotini xavf ostiga qoʻyishni oqlay olmaydi».

Biroq, litsey oʻquvchilari manfaatlarini himoya qiluvchi Frantsiya kasaba uyushmasi norozilik namoyishlari ular duch kelayotgan sharoitlarga «qonuniy javob» ekanini aytdi.

Ichki ishlar vaziri Loran Nunyes dushanba kuni xavfsizlik kuchlarining 12 nafar aʼzosi, 12 nafar oʻquvchi va uch nafar maktab xodimi jarohatlangani, 180 ta maktab zarar koʻrganini maʼlum qildi.

U hibsga olinganlar haqida boshqa tafsilotlarni ochiqlamadi.

Buyuk Britaniyadagi kollej yoki AQShdagi yuqori sinflarga teng boʻlgan Frantsiya litseylaridagi harakat oʻtgan hafta Parijni oʻrab turgan Il-de-Frans mintaqasida boshlangan edi.

Vandalizm holatlari qayd etildi, politsiyaga qarata pirotexnika vositalari otildi va shundan beri noroziliklar Frantsiyaning boshqa hududlariga ham tarqaldi.

AFP axborot agentligi xabariga koʻra, janubiy Alp-Maritim va Var mintaqalarida toʻrtta litsey toʻsib qoʻyilgan. Norozilik namoyishlari Marsel, shimoliy Lill hududi va shimoli-sharqiy Ardennadagi Sedanda ham qayd etilgan.

Oʻquvchilar manfaatlarini ifodalovchi «Union Syndicale Lycéenne» kasaba uyushmasi ijtimoiy tarmoqdagi postida noroziliklarni himoya qildi.

«Oʻqituvchilar va xodimlar yetishmovchiligi, xarob boʻlgan maktablar, haddan tashqari tigʻiz jadvallar va gavjum sinflar, Parcoursup [Frantsiyada talabalar oliy taʼlimning birinchi yiliga hujjat topshirishlari uchun foydalaniladigan veb-platforma] tufayli yuzaga kelgan stress... Bu muammolar aslo muqarrar emas, balki shunchaki Makron siyosatining 10 yili va milliy taʼlim tizimida resurslar yetishmasligi natijasidir», deyiladi unda.

Uyushma oʻquvchilarni seshanba kuni «oʻz huquqlarini himoya qilish va byudjetni qisqartirishga qarshi» maktablarni toʻsib qoʻyishga chaqirdi.

Shu kuni oʻqituvchilar, shifoxona xodimlari va davlat xizmatchilari manfaatlarini ifodalovchi kasaba uyushmalari ham past ish haqi va mehnat sharoitlari kabi muammolarga norozilik sifatida bir kunlik ish tashlashga chaqirdi.

Talabalar harakatiga javoban Lekornyu «litseylarning muammolari eshitilishi va hal qilinishi kerak», ammo «zoʻravonlik soʻzsiz qoralanishi va uni sodir etganlar oʻz qilmishlari uchun javob berishi kerak» dedi.

Bosh vazir, shuningdek, oʻta chapchi «Boʻysunmas Frantsiya» (LFI) partiyasini oʻquvchilarni harakatni kengaytirishga undashda aybladi.

LFI yetakchisi Jan-Lyuk Melanshon Lekornyu hukumatini norozilik namoyishini «bostirishga buyruq berganlikda» aybladi va unda ishtirok etayotgan litsey oʻquvchilari «bezarar» ekanini qoʻshimcha qildi.

Ammo Nunyes namoyishlar va toʻsiqlar «unchalik odatiy norozilik harakatlari emasligini» aytdi.

«Bu koʻproq shahardagi zoʻravonliklarga oʻxshaydi, unda niqob taqqan, naychalardagi pirotexnika vositalari va uloqtiruvchi snaryadlar bilan jihozlangan bir qator shaxslar ichki xavfsizlik kuchlari bilan toʻqnashishni ochiqdan-ochiq xohlashgan», dedi u.

«Bu talablar qoʻyish haqida emas edi; bu haqiqatan ham sof koʻrinishdagi zoʻravonlik edi».

Norozilik namoyishlari boshlanganidan beri oʻquvchilar va politsiya xodimlari oʻrtasida zoʻravonlik bilan bogʻliq bir nechta hodisalar qayd etilgan.

Frantsiyaning BFMTV telekanali xabariga koʻra, hodisalardan birida politsiya xodimi olomonni nazorat qilish uchun ishlatiladigan granatamyotdan oʻq uzgan va oqibatda bir litsey oʻquvchisi jarohatlangan.

Telekanal ushbu hodisalar yuzasidan tergov harakatlari boshlanganini qoʻshimcha qildi.