FIDE reytingi yangilandi. Nodirbek Abdusattorov ko‘tarildi, Javohir Sindorov esa o‘z o‘rnini saqlab qoldi

FIDE reytingi yangilandi: Nodirbek Abdusattorov yuqoriladi, Javohir Sindorov o‘rnini saqlab qoldi

Xalqaro shaxmat federatsiyasi (FIDE) 2026-yil avgust oyi yakunlari bo‘yicha dunyoning eng kuchli shaxmatchilari reytingini e’lon qildi. Yangilangan ro‘yxatda O‘zbekiston vakillarining o‘tgan oydagi o‘rinlari va ochkolarida bir qator o‘zgarishlar kuzatildi.

Ro‘yxatda norvegiyalik Magnus Karlsen 2823 ochko bilan birinchi o‘rinni saqlab qoldi. Ikkinchi o‘ringa 2792 ochko bilan AQSH vakili Hikaru Nakamura joylashdi (o‘tgan oyda 3-o‘rin edi). Uning hamyurti Fabiano Karuana esa ochkolari qisqargani (2792 dan 2789 ga) sababli 2-o‘rindan 3-pog‘onaga tushdi.

O‘zbekistonning birinchi raqamli shaxmatchisi Javohir Sindorov o‘z ochkolarini 2777 dan 2778 taga oshirib, jahon reytingidagi 4-o‘rnini saqlab qoldi. Nodirbek Abdusattorovning ochkolari o‘zgarishsiz (2762) qolgan bo‘lsa-da, u umumiy ro‘yxatda 8-o‘rindan 7-pog‘onaga ko‘tarildi.

Kuchli yuztalikdan joy olgan boshqa shaxmatchilarning ko‘rsatkichlari o‘tgan oyga nisbatan quyidagicha o‘zgardi:

Nodirbek Yoqubboyev — 2685 ochko (ochko ham, 39-o‘rin ham o‘zgarishsiz qoldi);

Rustam Qosimjonov — 2665 ochko (ochko o‘zgarmadi, biroq 52-o‘rindan 48-pog‘onaga ko‘tarildi);

Shamsiddin Vohidov — 2654 ochko (o‘tgan oyda 2655 ochko edi, o‘rni o‘zgarmagan — 61-pog‘ona).

Ayollar reytingi va federatsiyalar ko‘rsatkichi

Ayollar o‘rtasidagi Top-100 ro‘yxatida Afruza Hamdamova ochkolarini 2440 dan 2443 taga yetkazdi va 26-o‘rinda qoldi. Gulruhbegim Tohirjonova esa 2355 dan 2357 ochkoga ko‘tarilib, 82-o‘rindan 80-pog‘onaga ko‘tarildi.

Federatsiyalar o‘rtasidagi umumiy reytingda O‘zbekiston terma jamoasi 2628 ochko bilan jahonda 6-o‘rinni egallab turibdi. Ushbu ro‘yxatda dastlabki uchta o‘rinni AQSH (2725 ochko), Hindiston (2705 ochko) va Xitoy (2664 ochko) jamoalari band etgan.