Fargʻona viloyatida bir kilogramm opiyni 20 ming dollarga sotishga urinishdi. Video
Fargʻona viloyatida bir kilogramm opiyni 20 ming dollarga sotmoqchi boʻlganlar ushlandi. Video
Fargʻona viloyatining Yozyovon tumanida huquq-tartibot idoralari xodimlari yirik hajmdagi opiy moddasi sotilishining oldini olishdi. Erkak oʻzining sherigi ekani taxmin qilinayotgan shaxs bilan bitim tuzayotgan vaqtda ashyoviy dalillar bilan qoʻlga olindi. Huquq-tartibot idoralari maʼlumotlariga koʻra, sotuvchi bir kilogramm giyohvandlik moddasi uchun 20 ming dollar olishni koʻzlagan.
Operatsiya IIV Tezkor-qidiruv departamenti, Fargʻona viloyati IIB, Davlat xavfsizlik xizmati va boshqa huquq-tartibot idoralari xodimlari tomonidan «Qoradori-2026» tezkor-profilaktika tadbiri doirasida oʻtkazildi.
Maxsus operatsiya davomida Andijon viloyatida tugʻilgan 45 yoshli erkak qoʻlga olindi. Huquq-tartibot idoralari xodimlarining maʼlum qilishicha, u giyohvandlik moddasini 28 yoshli yigitga sotmoqchi boʻlgan.
Tezkor xodimlar ushbu modda opiy ekanligini aniqlashdi. Noqonuniy bozorda bir kilogramm giyohvandlik moddasining narxi 20 ming dollarga baholangan. Huquq-tartibot idoralari maʼlumotlariga koʻra, musodara qilingan partiyaning umumiy qiymati qariyb 240 million soʻmni tashkil etdi.
Mazkur holat yuzasidan giyohvandlik vositalarining noqonuniy aylanishi uchun javobgarlikni nazarda tutuvchi 273-modda bilan jinoyat ishi qoʻzgʻatilgan. Tergov harakatlarini Qoʻqon shahar IIB huzuridagi tergov boʻlimi olib bormoqda.
Avvalroq Surxondaryo viloyatida huquq-tartibot idoralari xodimlari 40 kilogrammdan ortiq opiyni qoʻlga olishgan edi. Giyohvandlik moddalari avtomobilda tashilgan, yukni qabul qilib oluvchilar esa nazorat ostida yetkazib berish usuli bilan qoʻlga olingan.