“Falastinsiz Yaqin Sharqda xavfsizlik bo‘lmaydi” — Iordaniya qiroli
Abdulloh II Isroilning xatti-harakatlarini mintaqa kelajagiga eng katta tahdid deb atadi. U tinchlikka erishishning yagona yo‘li Falastin davlatini tuzish ekanini yana bir bor eslatdi.
“Falastinsiz Yaqin Sharqda xavfsizlik bo‘lmaydi” — Iordaniya qiroli
Falastin xalqi o‘z vataniga ega bo‘lmaguncha, Yaqin Sharqda xavfsizlik qaror topmaydi.
“Mintaqamizda Falastin xalqining o‘z vataniga bo‘lgan huquqi ta’minlanmas ekan, hech qanday xavfsizlik va barqarorlik bo‘lmasligini qayta-qayta ta’kidlaymiz”, dedi qirol Iordaniya parlamenti sessiyasining ochilishida.
Iordaniya Isroil hamda Iordan daryosining bosib olingan G‘arbiy Sohili bilan chegaradosh davlat hisoblanadi. Mamlakat uzoq yillardan beri “ikki davlat” yechimini qo‘llab-quvvatlab keladi. Iordaniya 1994-yilda Isroil bilan tinchlik shartnomasini imzolagan edi.
Qirol nutqida Isroilning harakatlariga ham to‘xtaldi. U xalqaro hamjamiyatning chaqiriqlariga qaramay, vaziyat hanuz murakkabligicha qolayotganini aytdi.
“Isroil qonunbuzarliklarini to‘xtatish bo‘yicha xalqaro chaqiriqlarga qaramay, G‘azodagi gumanitar fojia davom etmoqda. G‘arbiy Sohil va Quddusda shafqatsiz hujumlar to‘xtamayapti. Isroilning ekspansionistik (hududlarni kengaytirish) intilishlari esa mintaqaning kelajagi va umidlariga eng katta tahdid bo‘lib qolmoqda”, dedi Abdulloh II.
Qirolning bu bayonoti Isroildagi parlament saylovlaridan bir necha kun o‘tib yangradi. Saylovda bosh vazir Binyamin Netanyaxuning partiyasi eng ko‘p ovoz oldi. Biroq u ko‘pchilik o‘rinni qo‘lga kirita olmadi. Shuningdek, so‘nggi kunlarda mintaqada yangi to‘qnashuv xavfi ortib bormoqda. Eron agar AQSH va Isroil unga qarshi zarbalarni qayta boshlasa, javob qaytarishga va’da bergan.