Eron Janubiy Koreyani Hormuz bo‘g‘ozidagi jarayonlarga aralashmaslikka chaqirdi

**Eron Janubiy Koreyani Hormuz bo‘g‘ozidagi jarayonlarga aralashmaslikka chaqirdi**

Eron Tashqi ishlar vazirligi Janubiy Koreyani Hormuz bo‘g‘ozidagi AQSH operatsiyalariga qo‘shilmaslik va u yerga harbiylarni yubormaslik haqida ogohlantirdi. Tehron bunday qadam jiddiy oqibatlarga olib kelishini bildirdi.

O‘tgan hafta Seul strategik ahamiyatga ega Hormuz bo‘g‘ozida AQSH xavfsizlik sa’y-harakatlariga hissa qo‘shish masalasini ko‘rib chiqayotganini bildirgan edi. Tehron 28-fevral kuni AQSHga qarshi urush boshlanganidan beri bu bo‘g‘ozni asosan o‘z nazoratida ushlab turibdi.

Janubiy Koreya o‘z harbiy tayyorgarligiga zarar yetmagan taqdirdagina bu qadamni ko‘rib chiqishini bildirgan. Biroq hozircha yakuniy qaror qabul qilinmagan.

7-sentyabr kuni Eron Tashqi ishlar vazirligi matbuot kotibi Ismoil Baqoiy Janubiy Koreyani AQSHning “bosimi va qo‘rqitishlari”ga taslim bo‘lmaslik haqida ogohlantirdi.

“Fors ko‘rfazi yoki Hormuz bo‘g‘oziga boshqa mamlakatlarning harbiylar yuborishi yoki operatsiyalarda qatnashishi tajovuzkor tomonni to‘g‘ridan to‘g‘ri qo‘llab-quvvatlash deb baholanadi. Bu jiddiy oqibatlarga olib keladi”, deb yozdi u X ijtimoiy tarmog‘idagi sahifasida.

Aprel oyida sulh tuzilib, shiddatli bombardimonlar to‘xtaggan bo‘lsa-da, Eron va AQSH Hormuz bo‘g‘ozi hamda uning atrofida bir-biriga zarba berishda davom etmoqda.

Har ikki tomon Hormuz bo‘g‘ozini nazorat qilish uchun kurashayotgani sababli muzokaralar boshi berk ko‘chaga kirib qolgan. Odatda bu suv yo‘lidan jahon neft va suyultirilgan tabiiy gaz eksportining beshdan bir qismi o‘tardi. Urush boshlanganidan beri bu muhim suv yo‘lidagi harakat deyarli to‘xtab qolgan. Bu esa jahon energiya bozorlariga salbiy ta’sir ko‘rsatdi.

Ayni paytda Eron bo‘g‘ozdan o‘tayotgan kemalardan ruxsat so‘rashni talab qilmoqda. Vashington va mintaqadagi bir qancha davlatlar bunday tartibga qarshi chiqmoqda. Eron esa cheklovsiz kemalar qatnovi tizimiga qaytilmasligini ta’kidlamoqda.