AQSH Janubiy Koreya bilan yana bir harbiy mashg‘ulotni bekor qildi

AQSH Janubiy Koreya bilan yana bir harbiy mashg‘ulotni bekor qildi. Bu haqda Seul dengiz piyodalari korpusi 24-avgust kuni ma’lum qildi.

Sentyabr oyiga rejalashtirilgan ushbu qo‘shma harbiy-dengiz amaliyotining bekor qilinishiga Vashington Erondagi urush tufayli amerikalik harbiylarni jalb qilish imkoniyati cheklanganini sabab qilib ko‘rsatdi. AQSH Dengiz piyodalari korpusi iyun oyida Janubiy Koreya rasmiylariga Sangyong deb nomlanuvchi bu mashg‘ulot uchun qo‘shinlar yetishmasligini rasman bildirgan edi.

Ikki ittifoqchi harbiy mashg‘ulotlarni keyinchalik qayta tiklash bo‘yicha muzokaralarni davom ettirmoqda. Biroq Janubiy Koreya Dengiz piyodalari korpusi vakili mashg‘ulotlar bekor qilinishining o‘rnini qoplash bo‘yicha aniq choralar haqida ma’lumot bermadi.

AQSH prezidenti Donald Tramp o‘tgan hafta boshqa bir yillik qo‘shma mashg‘ulotni rejadagidan bir necha kun oldin to‘xtatishni buyurgan edi. Tramp buni xarajatlar hamda Seulning Erondagi urushda qatnashishni istamagani bilan izohlagan.

Tramp o‘zining Truth Social platformasida Ulchi Freedom Shield mashg‘ulotlari Shimoliy Koreyaga nisbatan noto‘g‘ri va dushmanona signal berganini yozgan. U o‘zi prezident bo‘lgan davrda Shimoliy Koreya xavf solmagani va hurmat ko‘rsatganini ta’kidlagan.

Biroq Tramp mashg‘ulotlarni qisqartirganidan ko‘p o‘tmay, Pxenyan 10 ta qisqa masofaga uchuvchi ballistik raketa uchirdi hamda har yili o‘tkaziladigan ushbu mashg‘ulotlarni qoralab rasmiy bayonot berdi. Shimoliy Koreya bunday qo‘shma mashg‘ulotlarni muntazam ravishda bosqin mashqlari deb atab keladi.