Erkak 4 yoshli qizchani buloqqa tashlagani uchun 300 soatlik jamoat ishlariga hukm qilindi
Tashkent Times — Oʻzbekistonning barcha soʻnggi yangiliklarini yoritib boruvchi ingliz tilidagi onlayn-gazetadir
4 yoshli qizni buloqqa tashlab yuborgan erkak 300 soatlik majburiy jamoat ishlariga hukm qilindi
Andijon viloyati Baliqchi tumanida 4 yoshli qizni buloqqa tashlab yuborgan 41 yoshli erkakka sud tomonidan 300 soatlik majburiy jamoat ishlari jazosi tayinlandi.
Xoʻjaobod tumani jinoyat ishlari boʻyicha sudi A.X. ismli erkakni Jinoyat kodeksining 277-moddasi 2-qismi «d» bandi bilan bezorilikda aybdor deb topdi.
Hujjatga koʻra, hodisa 2026 yil 25 aprel kuni soat 19:00 larda «Goʻrovon» mahallasida sodir boʻlgan. A.X. sudda oʻsha kuni soat 10:00 larda bir stakan pivo va 200 gramm aroq ichganini, soʻng tanishining televizor tuzatish ustaxonasiga borib, u yerda qizchani koʻrganini aytgan.
«Qabristondan oʻtib ketayotganim esimda. Undan keyin juda mast boʻlganim uchun nima qilganimni eslay olmayman», — dedi u sudda. U keyinchalik mastlikdan davolash maskanida uygʻonganini bildirdi.
Voqea joyida boʻlgan Muattar ismli ayol qizchani suvdan chiqarib olib, uyiga olib borgan, kiyimlarini almashtirgan va 102 shoshilinch xizmatiga qoʻngʻiroq qilgan.
Qizning onasi D.M. sudda qizi soat 18:00 larda koʻchaga oʻynagani chiqib ketgani va qaytib kelmaganini aytdi. Soat 20:00 larda akasi qoʻngʻiroq qilib, notanish erkak qizni koʻchada uchratib, «Sen mening bolamsan, yur» deb olib ketib, yoʻl chetidagi buloqqa tashlab yuborganini aytgan. U qizining sogʻligʻi hozirda yaxshi ekanini bildirib, suddan erkakka nisbatan qonuniy chora koʻrishni soʻradi.
A.X. sudda qizchani oʻzining oʻgʻli deb oʻylaganini va uni suvga tashlaganini eslay olmasligini aytdi. U qilgan ishidan pushaymonligini va qizning ota-onasidan kechirim soʻraganini bildirdi.