Qashqadaryoda oʻgay ona toʻrt yoshli oʻgay qizini kaltaklab oʻldirdi
Qashqadaryoda oʻgay ona toʻrt yoshli oʻgay qizini kaltaklab oʻldirdi
Qashqadaryo viloyatida toʻrt yoshli qizcha tergov maʼlumotlariga koʻra oʻgay onasi tomonidan yetkazilgan tan jarohatlari oqibatida vafot etdi. Avvaliga jinoyat ishi oʻlimga sabab boʻlgan qasddan badanga shikast yetkazish moddasi boʻyicha qoʻzgʻatilgan edi, biroq keyinchalik u qasddan odam oʻldirish moddasiga qayta malakalanib, viloyat prokuraturasiga topshirildi.
Bolalar ombudsmani maʼlumotlariga koʻra, 26 sentyabr kuni 32 yoshli ayol va uning turmush oʻrtogʻi oʻrtasida janjal kelib chiqqan. Nizo paytida oʻgay ona oʻgay qizini urgan, qizcha boshidan ogʻir jarohat olib, koʻp oʻtmay vafot etgan.
Ertasi kuni tuman ichki ishlar boʻlimi tomonidan jabrlanuvchining oʻlimiga sabab boʻlgan qasddan shikast yetkazish boʻyicha 126-modda bilan jinoyat ishi qoʻzgʻatildi. Gumonlanuvchi hibsga olindi.
Biroq 30 sentyabr kuni ish Qashqadaryo viloyati prokuraturasiga oʻtkazildi va Jinoyat kodeksining 97-moddasi — «Qasddan odam oʻldirish» moddasiga qayta malakalandi. Endilikda sudgacha boʻlgan tergov harakatlarini viloyat prokuraturasi olib bormoqda, u tergov jarayonini nazorat qiladi va jamoatchilikni xabardor qilib boradi.
Ushbu fojia bolalar huquqlarini himoya qilish sohasidagi qonunchilik kuchaytirilishi bilan bir vaqtga toʻgʻri keldi. 2 oktyabr kuni Senat bolaning oʻlimiga sabab boʻlgan qasddan sodir etilgan jinoyatlarda aybdor deb topilgan shaxslarga nisbatan shartli hukm qilish va jazodan muddatidan ilgari shartli ozod qilishni taqiqlovchi qonunni maʼqulladi.
Bundan avval Zangiotadagi oʻgay ona oʻgay qizini muntazam ravishda kaltaklab kelgan va unga bor-yoʻgʻi 3,5 yil muddatga ozodlikni cheklash jazosi berilgan edi.