Braziliyada saylov uchastkalari yopildi, Lula va Flavio Bolsonaru deyarli teng natija koʻrsatmoqda
Agar nomzodlarning hech biri 50 foizdan koʻp ovoz ololmasa, saylovning ikkinchi turi 25 oktyabr kuni boʻlib oʻtadi.
Braziliyada saylov uchastkalari yopildi, Lula va Flavio Bolsonaru deyarli teng ketmoqda
Bugun Braziliyadagi umumiy saylovlarda qariyb 160 million kishi ovoz berish huquqiga ega.
Braziliyada prezidentlik poygasining keskin kurashlarga boy oʻtgan birinchi turida saylovchilar uzun navbatlarda kutganidan soʻng, umumiy saylovlarda ovoz berish yakunlandi.
Ovoz berganidan keyin 80 yoshli soʻlchi prezident Luis Inasiu Lula da Silva tanlov demokratiya va «vahshiylik» oʻrtasida ekanini aytdi.
Uning raqibi, 45 yoshli oʻng qanot vakili Flavio Bolsonaru esa «Braziliya xalqini ozod qilishni» istashini bildirdi.
Poyga keskin kechishi kutilmoqda. BBC Brazil soʻrovnomalari agregatori Lula va Bolsonaru oʻrtasidagi farqni bor-yoʻgʻi ikki foiz deb koʻrsatmoqda. Agar nomzodlarning hech biri 50 foizdan koʻp ovoz ololmasa, saylovlar 25 oktyabrda boʻlib oʻtadigan ikkinchi turga oʻtadi.
Braziliya Oliy saylov sudi (TSE) maʼlumotlariga koʻra, 158,7 milliondan ortiq braziliyalik, jumladan, xorijda yashovchi bir million kishi ovoz berish huquqiga ega.
Lula 11 nafar raqib bilan toʻqnash kelmoqda, garchi BBC Brazil soʻrovnomalari agregatori Lula va Bolsonarudan boshqa nomzodlar atigi 10 foiz atrofida ovoz olishini koʻrsatmoqda.
TSE rasmiy natijalar uchun aniq vaqtni eʼlon qilmadi, biroq ular bir necha soat ichida kutilmoqda, chunki ovoz berish elektron shaklda amalga oshiriladi va oʻtmishdagi saylovlar natijalar odatda tez chiqishini koʻrsatgan.
Bolsonaruning gʻalabasi AQSh prezidenti Donald Tramp bilan hamfikr boʻlgan oʻng qanot nomzodlarning Lotin Amerikasi boʻylab gʻalabalari seriyasini davom ettiradi, Lulaning qayta saylanishi esa savdo va xavfsizlik masalalarida uning hukumati bilan toʻqnash kelgan Vashington uchun qiyinchiliklar tugʻdiradi.
Xorijdagi braziliyaliklar ovoz berishi mumkin boʻlgan baʼzi davlatlar dastlabki ovoz berish natijalarini eʼlon qilib ulgurdi.
Xitoyda Lula 56,63 foiz ovoz oldi, Bolsonaru esa 31,33 foiz bilan ikkinchi oʻrinni egalladi. Lula, shuningdek, Janubiy Koreya, Yangi Zelandiya va Saudiya Arabistoni kabi mamlakatlarda ham gʻalaba qozondi.
Isroilda esa Bolsonaru haqiqiy ovozlarning 74,40 foizini qoʻlga kiritdi. U, shuningdek, Yaponiyada ham haqiqiy ovozlarning 71,59 foizini oldi.
Bugungi natija, shuningdek, 2027 yil fevralidan boshlab Senat tarkibini ham belgilab beradi, chunki Senatdagi 81 ta oʻrindan 54 tasi, yaʼni palataning uchdan ikki qismi saylovga qoʻyilgan.
Hozirgi vaqtda Senatdagi eng yirik blok Bolsonaruning Liberal partiyasi (PL) boʻlib, undan keyin Lula rahbarligidagi koalitsion hukumat tarkibiga kirgan Sotsial-demokratik partiya (PSD) turadi.
Toʻrt yil avvalgi oʻtgan saylovlarda Lula Flavio Bolsonaruning otasi Jairni kichik farq bilan magʻlub etgan edi. Ammo oʻsha ovoz berishdan keyingi tartibsizliklar — minglab tarafdorlari Braziliya Kongressiga bostirib kirganidan soʻng Jair Bolsonaruning davlat toʻntarishiga urinishda aybdor deb topilishi — mamlakat siyosiy hayotida va ushbu saylovlarda oʻchmas iz qoldirdi.
Jair Bolsonaru davlat toʻntarishini rejalashtirganlik uchun 27 yillik qamoq jazosini oʻtamoqda va unga davlat lavozimlariga nomzodini qoʻyish taqiqlangan.
Salomatligidagi surunkali muammolar tufayli u hozirda qamoqxonada emas, balki uy qamogʻida saqlanmoqda, biroq unga ijtimoiy tarmoqlarda post qoldirish yoki ommaviy bayonotlar berish taqiqlangan.
Ushbu cheklovlarga qaramay, Flavio Bolsonaru otasining qoʻllab-quvvatlashiga ega ekanligiga shubha yoʻq.